Վատիկանի լրտեսական պատմությունն ուշադրության կենտրոնում է խարդախության գործի վերսկսումից հետո

Խարդախության եւ դրամաշորթության վերաբերյալ Վատիկանի դատական գործը ուրբաթ վերսկսվել է որոշ անպարկեշտ փաստերի բացահայտումից հետո։ Դրանք վերաբերում են այն բանին, թե ինչպես է աշխատում Սուրբ Աթոռը, եւ ուշադրության կենտրոնում է հայտնվել լրտեսական պատմությունը, որն ավելի շատ գործակալ 007-ի մասին թրիլեր է հիշեցնում, գրում է AP-ը։

Գրավոր ցուցմունքների համաձայն՝ Ֆրանցիսկոս պապի գլխավոր խորհրդականներից մեկը իտալական գաղտնի ծառայության աշխատակիցներից մեկին հրավիրել է ստուգել իր աշխատասենյակը՝ պարզելու, թե արդյոք այն գաղտնալսվում է, եւ պատվիրել է իրեն հանձնել հետախուզական հաշվետվություններ՝ շրջանցելով Վատիկանի սեփական ոստիկանությանը։

Արքեպիսկոպոս Էդգար Պենյա Պարայի՝ Վատիկանի պետական քարտուղարության թիվ 2 անձի գործողությունների մասին տեղեկությունները վեր են հանում մի շարք հիմնարար հարցեր Վատիկան քաղաք-պետության անվտանգության եւ ինքնիշխանության մասին, քանի որ արքեպիսկոպոսը հրավիրել էր օտարերկրյա հետախուզությունների աշխատակիցներին Սուրբ Աթոռի ներքին սրբարաններ, եւ հետո դրսի քննությանն (աութսորսինգ) էր հանձնել Վատիկանի ոստիկանության ներքին լրտեսական աշխատանքը։

Պենյա Պարան որեւէ հանցագործության մեջ չի մեղադրվում, ի տարբերություն իր ենթակաների։ Նրանք մտնում են այն 10 մարդկանց մեջ, ներառյալ երբեմնի հզոր կարդինալը, որոնց դատում է Վատիկանի քրեական դատարանը՝ Լոնդոնի անշարժ գույքում 350 մլն եվրո անհաջող ներդրումներ կատարելու հետ կապված։

Դատավարության ժամանակ, որը վերսկսվել է ուրբաթ օրը, դատախազությունը մեղադրել է Սուրբ Աթոռի վաղեմի կառավարչին, իտալացի բրոքերներին եւ իրավաբաններին այն բանում, որ նրանք Հռոմի պապից տասնյակ միլիոնավոր եվրո են «պոկել», իսկ հետո Վատիկանից շորթել 15 մլն եվրո, որպեսզի, վերջապես, անշարժ գույքի սեփականության լիակատար իրավունք ստանան։

Պարայի դերն այս աղմկահարույց գործում միշտ նորմից դուրս է եղել, քանի որ նա լիազորել է իր ենթականերին բանակցություններ վարել գործարքի վերջնական պայմանագրերի շուրջ, իսկ հետո նախաձեռնել է կասկածելի տրանզակցիայի մասին հաշվետվություն՝ 150 մլն եվրոյի վարկ խնդրելով Վատիկանի բանկից՝ անշարժ գույքի հիփոթեքը մարելու համար։ Բայց դատախազները կարողացել են գոնե առայժմ նրան զերծ պահել մեղադրանքից։

Իտալական adnkronos գործակալության եւ «Դոմանի» օրաթերթի հրապարակած նոր ցուցմունքներն ի հայտ են բերել գործի եւս մեկ շրջադարձ եւ ընդգծել հոլիվուդյան ինտրիգների մակարդակը, որոնք միշտ չէ, որ Վատիկանում ջրի երես են դուրս գալիս։ Գոնե մինչեւ հիմա։

Պենյա Պարայի տեղակալներից մեկը՝ Վինչենցո Մաուրիելոն, դատախազներին ասել է, որ 2019թ. մայիսին կամ հունիսին, այն բանից հետո, երբ լոնդոնյան գործարքն ավարտվել է, Պենյա Պարան իրեն ասել է, որ ցանկանում է, որ խուզարկություն կատարվի իր աշխատասենյակում, քանի որ կարծում է, որ իր անձնական խոսակցությունները «դրսից լսվել են»։

Պենյա Պարան հարցրել է, թե գիտի արդյոք Մաուրիելոն որեւէ մեկին Վատիկանի անվտանգության ծառայությունից դուրս, որը կարող է կատարել այդ աշխատանքը, եւ Մաուրիելոն առաջարկել է ընկերոջը, որն աշխատում էր AISI արտաքին հետախուզության իտալական ծառայությունում։ Մաուրիելոյի խոսքով՝ նախնական հանդիպումից հետո լրտես Անդրեա Թիներին խուզարկություն է կատարել, երբ պալատում շատ մարդ չկար։ Ոչինչ չի գտնվել։ Բայց հետո Պենյա Պարան խնդրել է Թիներիին որոշ հետախուզական տվյալներ ներկայացնել կարեւոր դեմքերի մասին։ Նրա խոսքով՝ Թիներին ու նրա ղեկավարը AISI-ում արդյունքները ներկայացրել են Պենյա Պարային՝ սպիտակ ծրար հանձնելով Վատիկանի տարածքում նրանց բազմաթիվ հանդիպումներից մեկի ժամանակ։

Անվտանգության հարցերում Վատիկանի եւ Իտալիայի համագործակցության մեջ անսովոր ոչինչ չկա. իտալական ոստիկանությունը պարեկում է Սուրբ Պետրոսի հրապարակում, եւ Վատիկանի ժանդարմների ու իտալական իրավապահ մարմինների միջեւ պաշտոնական համագործակցություն գոյություն ունի։ Բայց Թիներիի լրտեսական աշխատանքը հօգուտ Պենյա Պարայի դուրս է եկել պատոնական շրջանակներից, ընդ որում՝ միտումնավոր։ Մաուրիելոն հիշել է, որ մի անգամ ինքն անգամ ստիպված է եղել Թիներիին անցկացնել Վատիկանի անվտանգության ծառայության պահատնակի մոտից, որովհետեւ ժանդարմները չափից ավելի շատ հարցեր էին տալիս։

Պենյա Պարան, որը շարունակում է կատարել իր հիմնական աշխատանքը որպես Վատիկանի ներքին գործերի նախարար, հրաժարվել է մեկնաբանություններից՝ վկայակոչելով շարունակվող դատավարությունը։