Թուրքմենստանում արտահերթ նախագահական ընտրություններ տեղի կունենան

Թուրքմենստանում այս տարվա մարտի 12-ին արտահերթ նախագահական ընտրություններ կանցկացվեն, «ՌԻԱ Նովոստի»-ին ասել է Թուրքմենստանի Կենտրոնական ընտրական հանձնաժողովի նախագահի օգնական Բեզիրգեն Կարաեւը, փոխանցում է «ՌԻԱ Նովոստի»-ն:

Նախօրեին Թուրքմենստանի նախագահ Գուրբանգուլի Բերդիմուհամեդովը խորհրդարանի վերին պալատի՝ Ժողովրդական խորհրդի արտահերթ նիստին ասաց, որ անհրաժեշտ է կառավարումը զիջել երիտասարդ առաջնորդներին: Թուրքմենական լրատվամիջոցների փոխանցմամբ՝ «այդ կապակցությամբ ընտրությունների եւ հանրաքվեների անցկացման կենտրոնական հանձնաժողովի նախագահին հանձնարարվել է սկսել համապատասխան աշխատանքները՝ Թուրքմենստանի Սահմանադրությանը եւ օրենսդրությանը համապատասխան»։

«Թուրքմենստանի նախագահի հանձնարարականի համաձայն՝ երկրի Կենտրոնական ընտրական հանձնաժողովը սկսել է մարտի 12-ին կայանալիք արտահերթ նախագահական ընտրությունների նախապատրաստումը»,- «ՌԻԱ Նովոստի»-ն հեռախոսով հայտնել է Թուրքմենստանի ԿԸՀ ղեկավարի օգնականը։

Թուրքմենստանի նախագահ կարող է ընտրվել Թուրքմենստանի այն քաղաքացին, ով ծնվել է Թուրքմենստանում, քառասուն տարեկանից փոքր չէ, տիրապետում է պետական ​​լեզվին, վերջին տասնհինգ տարիներին մշտապես բնակվում եւ աշխատում է Թուրքմենստանում։ Թուրքմենստանի նախագահն ընտրվում է ուղղակիորեն Թուրքմենստանի ժողովրդի կողմից յոթ տարի ժամկետով եւ ստանձնում է պաշտոնը երդմնակալության պահից։ Վերջին նախագահական ընտրությունները Թուրքմենստանում կայացել են 2017 թվականին: Օրենքով հաջորդ ընտրությունները պետք է անցկացվեին 2024 թվականին։