Միլիարդ տարեկան սեւ ադամանդն աճուրդում գնել են կրիպտոարժույթով

Միլիարդ տարեկան սեւ ադամանդը, որը համարվում է ամենամեծն աշխարհում, 4,3 մլն դոլար արժողությամբ կրիպտոարժույթով գնվել է Լոնդոնի աճուրդում, տեղեկացնում է CNBC-ն։

Sotheby’s-ի տվյալներով՝ բնական սեւ գույնի ադամանդը, որը հայտնի է «Էնիգմա» անունով եւ կշռում է 555,55 կարատ, աճուրդի է հանվել Լոնդոնում փետրվարի 2-9-ը։

Աճուրդների տունը Թվիթերում հաստատել է, որ սեւ ադամանդը գնվել է կրիպտոարժույթով։ Sotheby’s-ը չի նշել գնորդի անունը, բայց գործարար Ռիչարդ Հարթը Թվիթերում գրել է, որ գնել է ադամանդը, որը կվերանվանի «HEX.com ադամանդ»՝ ի պատիվ բլոկչեյնում դեպոզիտային սերտիֆիկատների իր բիզնեսի։

2006թ. «Էնիգման» Գինեսի Ռեկորդների գրքում նշվել է որպես աշխարհում ամենամեծ երեսակված ադամանդը։ Sotheby’s-ը ադամանդն անվանել է «միլիարդ տարեկան ամենահազվադեպ հրաշքներից մեկը, որը հայտնի է մարդկությանը»։

«Ընդունված է կարծել, որ սեւ ադամանդի այս հատուկ տեսակը ստեղծվել է կամ մետեորիտների՝ գոլորշիների բնական քիմիական նստվածք առաջացնող հարվածների արդյունքում, կամ ոչ երկրային ծագում ունի եւ առաջացել է գերնոր պայթյուններից, որոնք ձեւավորել են ադամանդային աստղակերպերը՝ բախվելով Երկրի հետ»,- պարզաբանել են Sotheby’s-ում։