Կանանց պարի գաղտնիքները

Կանանց պարային շարժումներից առավել գրավիչ են կոնքերով շարժումները՝ պարզել են հոգեբանները։ Նաեւ հրապուրիչ են թվում ոչ համաչափ շարժումները եւ ռիթմի զգացողությունը։ Հետազոտության արդյունքները հրապարակվել են Scientific Reports ամսագրում։

Շարժումների գրավչությունը գնահատել են 200 տղամարդ եւ կին, որպես պարուհիներ հանդես են եկել 39 երիտասարդ կանայք։ Հիմնվելով նրանց շարժումների վրա, հատուկ motion capture տեխնոլոգիայի օգնությամբ, ստեղծվել են անդեմ եռաչափ մոդելներ։

Հետազոտության մասնակիցները պետք է գնահատեին 15 վայրկյան տեւողությամբ պարային հոլովակները 1-7 սանդղակով։ Ամենից շատ միավորներ ստացել են այն պարերը, որտեղ կանայք թափահարում են կոնքերը եւ ձեռքերով ոչ համաչափ շարժումներ են անում։ Այդպիսի շարժումների ավելցուկը կամ պակասը բնութագրվում էր որպես անփորձություն։
Ըստ քննադատների՝ հետազոտության թերությունը այն է, որ մասնակիցները եղել են միայն արեւմտյան մշակույթի ներկայացուցիչներ։ Այնուամենայնիվ, զուգընկեր գտնելու հարցում պարի դերի նշանակության վերաբերյալ հետազոտությունների մի ամբողջ շարքի հետ է կապվում նաեւ այս հետազոտությունը։