Bloomberg. ԱՄՆ-ը դիտարկում է ՌԴ-ին high-tech արտադրանքի մատակարարումը սահմանափակելու հարցը

Միացյալ Նահանգները դիտարկում է Ռուսաստանին բարձր տեխնոլոգիական արտադրանքի մատակարարումը սահմանափակելու տարբերակը, եթե նա հարձակվի Ուկրաինայի վրա։ Այս մասին շաբաթ օրը հայտնել է Bloomberg-ը՝ վկայակոչելով աղբյուրին, փոխանցում է ՏԱՍՍ-ը։

Նրա տեղեկություններով՝ ամերիկյան վարչակազմն ուսումնասիրում է բարձր տեխնոլոգիական արտադրանքի, ինչպես նաեւ ամերիկյան տեխնոլոգիաների կամ ծրագրերի օգտագործմամբ պատրաստված միկրոէլեկտրոնիկայի արտահանման սահմանափակման հարցը։ Բաղադրիչների եւ ապրանքների ցանկը կարող է տատանվել՝ սկսած ավիոնիկայից եւ գործիքներից մինչեւ սմարթֆոններ, խաղային կոնսոլներ եւ հեռուստացույցներ:

Ինչպես նշում է գործակալությունը, այս կերպ ԱՄՆ-ը ցանկանում է օգտագործել իր տեխնոլոգիական առավելությունը, որպեսզի հարված հասցնի Ռուսաստանի ռազմական եւ քաղաքացիական հատվածներին, ինչպես նաեւ տեխնոլոգիական ոլորտում նրա հավակնություններին։

ԱՄՆ վարչակազմի բարձրաստիճան պաշտոնյան շաբաթ օրը անվտանգության հարցերով ռուս-ամերիկյան առաջիկա բանակցություններին նվիրված ճեպազրույցում ասել է, որ Ուկրաինայի դեմ ագրեսիայի դեպքում Ռուսաստանը կբախվի «ֆինանսական ու տնտեսական պատժամիջոցների» եւ դիվանագիտական հետեւանքների: