Զասի այցը տեղի է ունենում մի ժամանակահատվածում, երբ ՌԴ-ն վերջնագիր է ներկայացրել ԱՄՆ-ին և ՆԱՏՕ-ին. Հայկ Նահապետյան

ՀԱՊԿ գլխավոր քարտուղար Ստանիսլավ Զասը դեկտեմբերի 21-23-ը աշխատանքային այցով Հայաստանում է: Այցի ընթացքում հանդիպում է նախատեսվում ՀԱՊԿ Հավաքական անվտանգության խորհրդի նախագահ, Հայաստանի վարչապետ Նիկոլ Փաշինյանի հետ, բանակցություններ կվարի Հայաստանի արտգործնախարար Արարատ Միրզոյանի, Պաշտպանության նախարար Սուրեն Պապիկյանի և Անվտանգության խորհրդի քարտուղար Արմեն Գրիգորյանի հետ։

Zarkerak.am-ի հետ զրույցում ռազմական փորձագետ, պահեստազորի գնդապետ Հայկ Նահապետյանն ասաց, որ եթե հաշվի առնենք, որ Զասի այցը տեղի է ունենում մի ժամանակահատվածում, երբ ՌԴ-ն վերջնագիր է ներկայացրել ԱՄՆ-ին և ՆԱՏՕ-ի անդամ երկրներին, բնականաբար, կարևոր այց է:

Նա հիշեցրեց, որ խոսքը դեկտեմբերի 15-ին ՌԴ ԱԳՆ-ի՝ ԱՄՆ պետքարտուղարությանը ուղղված երկու փաստաթղթերի մասին է, ըստ որոնց՝ ՌԴ-ն անվտանգության երաշխավորության համար սկզբունքորեն առարկայական սպառնալիք է տեսնում ՆԱՏՕ-ի առաջխաղացման մեջ՝ ներառյալ Ուկրաինայում: Միաժամանակ նշվում է, որ ՌԴ-ն վտանգ է տեսնում Ադրբեջանում և Վրաստանում ՆԱՏՕ-ի ակտիվացման մեջ՝ Թուրքիայի միջոցով: Այդ փաստաթղթերում, մանավորապես նշվում է, որ հետխորհրդային տարածքում՝ Հարավային Կովկասում, Միջին Ասիայում հանրապետությունների, նաև Ուկրաինայում ՆԱՏՕ-ի ներգրավվածությունը բացառելու համար ՆԱՏՕ-ի զորքերի տեղակայմանը սկզբունքորեն պետք է վերջ դրվի: «Այսինքն, ՌԴ-ն փաստացի նշել է իր ազդեցության ոլորտները և ԱՄն-ին ասել, որ եթե դա չավի՝ իրենք քայլեր են անելու և վերը նշված սպառնալիքները չեզոքացնելու ուղղությամբ: Միաժամանակ, նշվում է, որ ՌԴ-ն ևս սպառնալիքների լեզվով է խոսելու: Այս առումով Զասի ներկայությունը Հայաստանում կարևորվում է»:

Նահապետյանն ընդգծեց, որ ՆԱՏՕ-ի անդամ երկիր Թուրքիան գործնականում ռազմաքաղաքական դաշինքի մեջ է Ադրբեջանի հետ, օժանդակում է Վրաստանին և այդ առումով, բնականաբար, ՀԱՊԿ-ի համար կարևոր է Հայաստանը: «Եթե նաև հաշվի առնենք, որ այս պահին էլ ՌԴ-ում ռազմական կոլեգիայի ընդլայնված նիստ է ընթանում՝ իր մասշտաբներով ու ներկայացվածությամբ աննախադեպ՝ կարելի է հետևություններ անել, որ ՌԴ-ն ուլտիմատում է ներկայացրել հավուր պատշաճի: Ես այս այցի կարևորությունը դիտարկում եմ այս երկու իրողությունների տրամաբանության մեջ: ՀԱՊԿ-ի գործունեությունն իր դաշնակից երկրում, որի երկու հարևանները այս կամ այն չափով ներկայացվածություն ունեն՝ ի դեմս Թուրքիայի զինված ուժերի, կարևորվում է»:

Նրա դիտարկմամբ՝ սկզբունքորեն, եթե ՌԴ-ն ԱՄՆ-ի ու ՆԱՏՕ-ի հետ վերջնագրերի լեզվով է խոսում, բնականաբար, իր դաշնակիցները պետք է պատրաստ լինեն վերջնագրերի լեզվով խոսելու հարևան այն երկրների հետ, որոնք այս կամ այն կերպ կամ անդամակցում են ՆԱՏՕ-ին կամ ունեն ռազմաքաղաքական պայմանագիր:

«Այս համատեքստում պետք է ասեմ, որ 44-օյա պատերազմից հետո ՀՀ ԶՈՒ-ն որոշակի կորուտներ է կրել․ թե անձնակազմի, թե բարոյահոգեբանական վիճակի, թե ռազմատեխնիկայի առումով խնդիրներ կան, որոնք լուծելու համար պետք է ներարկումներ արվեն, զենք-զինամթերքի, մասնագետների առումով Ռուսաստանի համար կարևոր է իր դաշնակից երկրի՝ ՀՀ-ի զինված ուժերի օր առաջ, ժամ առաջ համալրումը»: