Կորոնավիրուսով վարակվել է մոլորակի յուրաքանչյուր 30-րդ բնակիչը. վիճակագրություն

Քովիդով հիվանդացությունն աշխարհում մնում է օգոստոսի վերջի մակարդակին. երկրորդ շաբաթն անընդմեջ աշխարհում հայտնաբերվում է կորոնավիրուսով վարակման մոտ 4,4 մլն նոր դեպք, հաշվարկել է ՏԱՍՍ-ը։

Ընդհանուր առմամբ, համավարակի սկզբից կորոնավիրուս է հայտնաբերվել ավելի քան 273 մլն մարդու մոտ։ Այսպիսով, դրանով վարակվել է մոլորակի յուրաքանչյուր 30-րդ բնակիչը, բայց հաշվարկներում հնարավոր են ոչ մեծ վրիպումներ կրկնակի վարակների պատճառով, որոնց վերաբերյալ վիճակագրությունն աշխարհի երկրները չեն հրապարակում։

Ընդ որում՝ աշխարհում վարակից մահացությունը նվազում է՝ վերջին յոթ օրում մահացել է 50,1 հազար վարակված, ինչը 2,2 հազարով ավելի քիչ է անցած շաբաթվա ցուցանիշից։ Համավարակի զոհերի ընդհանուր թիվը գերազանցել է 5,3 մլն-ը, այսինքն՝ կորոնավիրուսից մահացել է յուրաքանչյուր 50-րդ վարակվածը։