Լավրովը վստահ է, որ Ռուսաստանի, Հայաստանի եւ Ադրբեջանի եռակողմ գագաթնաժողովը տեղի կունենա

Ռուսաստանի արտգործնախարար Սերգեյ Լավրովը վստահ է, որ Ռուսաստանի, Հայաստանի եւ Ադրբեջանի եռակողմ գագաթնաժողովը տեղի կունենա։ Մեկնաբանելով Կրեմլի հայտարարությունը, թե նման հանդիպման համար անհրաժեշտ է բոլոր կողմերի համաձայնությունը, Լավրովը նշել է. «Կոնսենսուսի համար անհրաժեշտ է, որպեսզի բոլոր նրանք, ովքեր պատրաստվում են հանդիպել, համաձայնեն հանդիպմանը։ Վստահ եմ, որ նման հանդիպում տեղի կունենա»:

Ինչպես ավելի վաղ հայտնել էինք, ՌԴ նախագահի մամուլի քարտուղար Դմիտրի Պեսկովն ասել էր, որ Ռուսաստանի, Հայաստանի եւ Ադրբեջանի եռակողմ գագաթնաժողովն ինչ-որ փուլում անհրաժեշտ կլինի, սակայն դրա համար անհրաժեշտ է բոլոր կողմերի համաձայնությունը։

Նշենք, որ ենթադրվում էր, որ տեսաֆորմատով նման հանդիպում պետք է տեղի ունենար նոյեմբերի 8-9-ը՝ 44-օրյա պատերազմի ավարտի տարելիցի օրը։