Իր ակտիվում ունենալով վարչապետ, ոստիկանապետ և 16 գործող գյուղապետ՝ ՔՊ-ին ընտրել է 32%-ը

ՀՅԴ Երևանի Քաղաքային կոմիտեի ներկայացուցիչ Սարգիս Կարապետյանն արձագանքել է ՔՊ-ական պատգամավոր Վահագն Ալեքսյանյանին՝ նշելով հետևյալը.

«Ուրեմն հենց այ այս վեշմեշոկը (ուսապարկը նուրբ է սրա համար) գրում է, որ Իջևանում ՔՊ-ն 84% է հավաքել, իսկ ՀՅԴ-ն՝ 16, և ավելացնում, որ սա է սպասում ընդդիմությանը, եթե նա ընտրություններին մասնակցի սեփական դեմքով, այլ ոչ թե ուրիշի բեղ-մորուսով։

Դե ինչ, հետաքրքիր է նման միտք լսել մի վեշավոյից, ում կուսակցությունը Իջևանում հավաքում է 9800-ի մոտ ձայն 33 000 ընտրողից, որը այս պարագայում 32 տոկոս է անում, մոռանալով փաստել որ մի երեք ամիս առաջ նույն տարածքում 16 000-ի մոտ ձայն են հավաքել նիկոլականներով։

Իսկ ամենահետաքրքիր այն է, որ Իջևանում 9800 ձայն հավաքած կուսակցությունը իր ակտիվում ունի Իջևանցի վարչապետ, ոստիկանապետ և ցուցակում ներգրավել է 18 գործող գյուղապետերից 16-ին, որոնցից 14-ը, ըստ իջևանցիների, նախկին ՀՀԿ-ական գյուղապետեր են։ Իսկ ինչ վերաբերում է ցուցակի առաջին համարին, ապա նա նույնքան ՔՊ-ական է, որքան ես՝ Հոլանդիայի կանաչների կուսակցությունից։
Ուղղակի Իջևանում հարգված մարդ է, որին շանտաժով մցրել են ՔՊ ցանկ (ըստ օդում կախված լուրերի), և Իջևանում ամբողջ օրը շրջանառվող խոսակցություններից պարզ էր, որ մարդիկ ընտրում են Ճաղարյանի, այլ ոչ թե ՔՊ-ին։

Այնպես որ՝ եթե մենք ուրիշի բեղ-մորուսով ենք, ապա դուք ուղղակի տկլոր եք՝ բառիս բուն իմաստով»։