Մեկ տարում ռուս խաղաղապահները Լեռնային Ղարաբաղում ոչնչացրել են ավելի քան 26 000 պայթուցիկ սարք

Մեկ տարում ռուս խաղաղապահները Լեռնային Ղարաբաղում ոչնչացրել են ավելի քան 26 000 պայթուցիկ սարք։ Այս մասին հայտնում է Ռուսաստանի պաշտպանության նախարարությունը։

Ռուսական խաղաղապահ զորախմբի հումանիտար ականազերծման ստորաբաժանման զինծառայողները շարունակում են տարածքները եւ սոցիալական ենթակառուցվածքները պայթուցիկ օբյեկտներից մաքրելու աշխատանքները։

«2020 թվականի նոյեմբերի 23-ից մինչ օրս ռուսական խաղաղապահ զորախմբի հումանիտար ականազերծման ստորաբաժանումները ականազերծել են ավելի քան 2300 հեկտար տարածք, ինչպես նաեւ 683 կմ ճանապարհ, մոտ 2000 շենք: Ընդհանուր առմամբ հայտնաբերվել եւ վնասազերծվել է ավելի քան 26 000 միավոր զինամթերք»,-ասել է խաղաղապահ զորախմբի ներկայացուցիչ Իլյա Ստոլիչնին։

Նշվում է, որ տեղանքի մաքրման ժամանակ զինվորական ինժեներները կիրառել են ինժեներական հետախուզության եւ պաշտպանության նորագույն միջոցներ՝ ԻՄՊՍ-2 ականորսիչներ, ՕՎՌ-2 սակրավորի պաշտպանիչ կոստյում, «Կորշուն» պայթուցիկ սարքերի շարժական որսիչ, ինչպես նաեւ դժվար հասանելի տեղանքում ներգրավվել են ականներ հայտնաբերող շներ։