Դատավորը պիտի հիշի, որ հայրերի մեղքերի համար որդիներն են պատասխան տալիս. Գորիսի փոխհամայնքապետ

Գորիսի քրեակատարողական հիմնարկը դեռ չի ստացել Վերաքննիչ քրեական դատարանի՝ Գորիսի փոխհամայնքապետ Մենուա Հովսեփյանին կալանավորելու որոշումը, հետեւաբար Հովսեփյանը դեռ չի կալանավորվել։ Այս մասին NEWS.am-ի հետ զրույցում ասաց Մենուա Հովսեփյանի պաշտպան Արմեն Մելքոնյանը։

Մենուա Հովսեփյանն այսօր՝ նոյեմբերի 12–ին, ինքնակամ ներկայացել է Գորիսի քրեակատարողական հիմնարկ, որպեսզի կալանավորվի, սակայն ՔԿՀ–ն նրան չի ընդունել։

«Ինձ չընդունեցին, ես էլ եկա դատարան, որ հասկանամ, թե ինչու չեն ընդունում, էդքան վա՞տն եմ, որ ՔԿՀՆ–ն չի ընդունում»,– ասաց Գորիսի փոխհամայնքապետը։

Հիշեցնենք, որ Վերաքննիչ քրեական դատարանն երեկ՝ նոյեմբերի 11-ին, նախագահությամբ Սեւակ Համբարձումյանի, բեկանել է Գորիսի փոխքաղաքապետ Մենուա Հովսեփյանին գրավով ազատ արձակելու որոշումը եւ կալանավորման որոշում կայացրել։

«Դատարանում կլոունադա էր կազմակերպված։ Դատավորի ձայնի տոնը հուշում էր, որ բավականին լարված է վճիռը կարդալիս։ Երբ դատական նիստը փակվեց, չգիտես՝ ինչ իրավունքով, դատավորը հրաման տվեց դատախազին, որ դատարանի նիստերի դահլիճում ինձ կալանավորեն, բայց ինքը նման վճիռ չէր կարդացել, բոլորս նայեցինք իրար ու ծիծաղեցինք։ Դատավոր Սեւակ Համբարձումյանի պահվածքը հակապետական էր, նա երկիրի Սահմանադրության եւ օրենքների պահպանության հետ կապ չունի, որովհետեւ կամակատար է։ Փոխարենն արդարադատություն իրականացներ, հրաման կատարեց։ «Հարգարժան» դատավորը պետք է հիշի, որ հայրերի մեղքերի համար, որդիներն են պատասխան տալիս»,– ասաց Մենուա Հովսեփյանը։

Գորիսի փոխհամայնքապետը իրեն կալանավորելու որոշումը պատահական չի համարում, եւ այն կապում է Գորիս-Կապան ավտոճանապարհին ադրբեջանական մաքսակետերի տեղադրման հետ։

«Երբ հայտարարվեց, որ մաքսակետեր պետք է դրվեն, դատարանը որոշեց ինձ կալանավորել։ Դատարանն ինձ ասում էր՝ ազատության մեջ էիր, ինչու չգնացիր ու խանգարեցիր ադրբեջանցիներին մաքսակետեր դնելիս, այսինքն՝ դա ես պետք է անեի։ Շատ շնորհակալ եմ, որ ինձ էդքան ուժեղ են համարում, ես կպայքարեմ թե՛ ադրբեջանական մաքսակետերի, թե՛ դրանք դնողների, եւ թե՛ դրա թույլտվությունը տվողների դեմ»,– հավելեց Գորիսի փոխհամայնքապետ Մենուա Հովսեփյանը։

Հիշեցնենք նաեւ, որ Հովսեփյանին մեղադրանք է առաջադրվել ՀՀ ՔՕ 179 հոդվածի 3–րդ մասի 1 կետով (յուրացնելը կամ վատնելը պաշտոնեական դիրքն օգտագործելով, առանձնապես խոշոր չափերով) եւ ՀՀ ՔՕ 149.1 հոդվածի 2–րդ մասի 1–ին եւ 2-րդ կետերով (նախընտրական քարոզչությանը մասնակցելուն հարկադրելը, որը կատարվել է պաշտոնեական դիրքն օգտագործելով):