Գրետա Թունբերգի գլխավորությամբ ակտիվիստները բողոքի ցույցի են դուրս եկել Գլազգոյում

Մի քանի հազար կլիմայական ակտիվիստ Գրետա Թունբերգի գլխավորությամբ ուրբաթ օրը միացել են բողոքի ցույցին Գլազգոյում, որտեղ տեղի է ունենում ՄԱԿ-ի Կլիմայի փոփոխության շրջանակային կոնվենցիայի (COP26) Կողմերի 26-րդ համաժողովը։ Միջոցառման կազմակերպիչների խոսքով, որն առցանց հեռարձակում են բրիտանական հեռուստաալիքները, օրվա ընթացքում ցույցին կմասնակցի մինչեւ 10 հազար մարդ, փոխանցում է ՏԱՍՍ-ը։

Թունբերգը՝ վերջին տարիների միջազգային կլիմայական բողոքի ցույցերի ամենահայտնի դեմքը, ավելի վաղ իր կողմնակիցներին կոչ էր արել դուրս գալ Գլազգոյի փողոցներ եւ աջակցել ցուցարարներին։ Նախօրեին ԱՄՆ նախկին փոխնախագահ (1993-2001) Ալ Գորը եւ բրիտանական գահի ժառանգորդ Ուելսի արքայազն Չարլզը կոչ էին արել լսել երիտասարդների ձայնը։

«Մեծ զայրույթ և մեծ հիասթափություն է զգացվում,- հինգշաբթի հայտարարել էր Նորին Մեծությունը կոնֆերանսի վերջնական փաստաթղթերի վրա աշխատող բանակցողներին:- Վաղը նախատեսվում է մեծ երթ է նախատեսված, որին շատերն ինձ կոչ էին անում միանալ, ինչը դժվար կլիներ անել, բայց իմաստը դրանում չէ։ Խնդրում եմ` մի մոռացեք փողոց դուրս եկած մարդկանց մասին։ Մի մոռացեք, որ դա նրանց ապագան է»:

Ցուցարարների ձեռքին «Մենք չունենք պահեստային մոլորակ», «Պաշտպանենք ապագան», «Ոչ հանածո վառելիքին», «Երբ մենք միասնական ենք, մենք անպարտելի ենք» կարգախոսներով պաստառներ եւ գործելու կոչեր են՝ ուղղված համաժողովի պատվիրակներին եւ դրան մասնակցող մոտ 200 երկրների ղեկավարներին:

Ցուցարարների թվում կան բազմաթիվ դպրոցականներ, ովքեր բաց են թողնում դասերն ակցիային մասնակցելու համար, թեեւ Միացյալ Թագավորության կրթության նախարար Նադիմ Զահավին ավելի վաղ կոչ էր արել նրանց չանտեսել ուսումը։ Երիտասարդները հետեւում են Թունբերգի օրինակին, ով 2018 թվականին սկսեց այսպես կոչված դպրոցական կլիմայական գործադուլը` ամեն ուրբաթ նստացույց անելով Շվեդիայի խորհրդարանի դիմաց։ Նրա օրինակը ոգեշնչեց հարյուր հազարավոր մարդկանց, եւ շուտով Fridays For Future շարժումը միջազգային դարձավ: Թունբերգի համբավն էլ ավելի մեծացավ 2019 թվականի սեպտեմբերին ՄԱԿ-ում ունեցած զգացմունքային ելույթից հետո, որը մեծ հասարակական դժգոհություն առաջացրեց։ Իր ելույթում նա պետությունների ղեկավարներին հայտարարեց, որ իրենց դատարկ խոստումներով նրանք խլել են իր երազանքներն ու մանկությունը, ինչպես նաեւ նախատեց համաշխարհային առաջնորդներին օդի աղտոտվածության դեմ պայքարի համար բավարար ջանքեր չգործադրելու համար։

Անցյալ շաբաթ օրը գալով COP26-ին` նա առաջնորդներին կեղծավորներ անվանեց եւ վստահություն հայտնեց, որ ոչ իրենք, ոչ էլ ՄԱԿ-ի հովանավորությամբ անցկացվող համաժողովները չեն կարող լուծել կլիմայի փոփոխության խնդիրը: Նա իրեն թույլ տվեց անպարկեշտ արտահայտություն օգտագործել COP26-ի բարձր մակարդակի մասնակիցների հասցեին եւ ասաց, որ մարդիկ պետք է «կլիմայական արդարություն» պահանջեն եւ չհամակերպվեն «անվերջ բլա բլա բլա»-ի հետ: Այնուհետեւ նա ներողություն խնդրեց իր բառերի ընտրության համար եւ խոստացավ ապագայում չօգտագործել վիրավորական արտահայտություններ: