Դատարանը թույլ չտվեց Արմեն Գևորգյանին ԱԺ-ին վերադարձնել Ստրասբուրգ մեկնելու համար իրեն փոխանցված 404 հազար 729 դրամը

Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, ընթանում է ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, «Հայաստան» խմբակցության պատգամավոր Արմեն Գևորգյանի գործով դատական նիստը։

«Փաստինֆո»-ի հաղորդմամբ՝ պաշտպան Լուսինե Սահակյանը միջնորդություն է ներկայացրել դատարան՝ խնդրելով թույլատրել Արմեն Գևորգյանին՝ կալանքից ազատ բանկային հաշիվ ունենալ և կալանքի տակ գտնվող բանկային հաշվից փոխանցում կատարել։
Միջնորդության հիմքում դրվել է այն հանգամանքը, որ Արմեն Գևորգյանը, հանդիսանալով ԵԽԽՎ պատվիրակության անդամ, չի մեկնել Ստրասբուրգ քաղաք, քանի որ դատարանը թույլ չէր տվել Գևորգյանին մեկնել ՀՀ-ից։ Ստրասբուրգ մեկնելու համար ԱԺ-ն Գևորգյանի հաշվին է փոխանցել 404 հազար 729 ՀՀ դրամ՝ որպես օրապահիկ, բայց Գևորգյանը չի մեկնել գործուղման՝ դատարանի թույլ չտալու պատճառով, հետեւապես չի ծախսել նշված գումարը, ԱԺ-ի նկատմամբ առաջացել է պարտք, որը ենթակա է վերադարձման, սակայն հաշվի վրա առկա արգելանքը թույլ չի տալիս Գևորգյանին վերադարձնել ԱԺ պարտքը, ուստի, անհրաժեշտ է ստանալ դատարանի թույլտվությունը՝ գումարը ԱԺ գանձապետական հաշվին փոխանցելու համար։ Բացի այդ, չկայացած գործուղման արդյունքում, ՀՀ ԱԺ-ն կրել է վնաս՝ 507 հազար ՀՀ դրամի չափով, որն արդեն վճարված է եղել՝ որպես ավիատոմսի արժեք, սակայն ԱԺ-ն հնարավորություն չի ունեցել վերադարձնել այդ գումարը։

Նկատի ունենալով այն հանգամանքը, որ Արմեն Գևորգյանը, հանդիսանալով ԵԽԽՎ պատվիրակության անդամ, նա պարբերաբար գտնվելու է գործուղման մեջ, նրա բանկային հաշվեհամարին փոխանցվելու են գործուղման ծախսերի գումարը, որոնք պետք է օգտագործվեն՝ պաշտպանը խնդրեց թույլատրել Արմեն Գևորգյանին՝ ունենալ արգելանքի տակ չգտնվող առնվազն մեկ բանկային հաշիվ, որի միջոցով նա հնարավորություն կունենա օգտագործելու՝ որպես ԵԽԽՎ անդամի գործուղումի համար անհրաժեշտ գումարները։

Նախագահող դատավոր Աննա Դանիբեկյանն արձանագրեց, որ գործի՝ դատաքննության նախապատրաստման փուլում քննության առարկա է դարձվել Գևորգյանի գույքի վրա դրված արգելանքը վերացնելու հարցը, սակայն միջնորդության լուծումը հետաձգվել է՝ մինչև կալանադրված գույքի արժեքը որոշելը, ուստի, դատարանը գտնում է, որ սույն միջնորդությունը ներկայացվել է ոչ ժամանակին, հետևաբար, այս միջնորդությունը թողնվեց առանց քննության։

Լուսինե Սահակյանը հայտարարեց, որ դժվար է հասկանալ դատարանի որոշումները և պահանջեց պարզաբանել, թե ինչ կապ ունի նախորդ միջնորդությունը ներկայացված սույն միջնորդության հետ. Այս պարագայում առկա են այլ հանգամանքներ։

Արմեն Գևորգյանն էլ արձագանքեց՝ նշելով, որ գումարը պետական միջոցներից է և եթե այն փոխանցվել է իր հաշվեհամարին և չի օգտագործվել, պետք է վերադարձվի, որովհետև պետական միջոցներ են։

«Վաղը մյուս օրը, երբ պետական հիմնարկն աուդիտ անցնի, հաշվետվություններ է տալո։ Ի՞նչ են գրելու, որ Աննա Դանիբեկյանը թույլ չտվեց, որ Արմեն Գևորգյանին տրամադրված միջոցները հետ վերադարձվե՞ն, անհասկանալի իրավիճակ է, լուրջ եմ ասում։ Այս ամենը զավեշտի է վերածվում։ Ես այստեղ տեսնում եմ նաև լիազորությունների չարաշահում, որովհետև ամեն ինչից զատ այս գործողությունների արդյունքում նաև պետությանն է վնաս պատճառվում»,- նշեց Գևորգյանը։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։