Լոռու 3 համայնքապետեր հրաժարական են տվել ինքնակամ. բիզնես սկսելու կամ առողջական պատճառներով

Ընտրություններից հաշված օրեր անց լիազորությունները վայր են դրել Լոռու մարզի երեք համայնքապետեր։

Հարթագյուղ համայնքը 34 տարի ղեկավարելուց հետո Անդրանիկ Հարությունյանը որոշել է բիզնեսով զբաղվել. NEWS.am-ի հետ զրույցում նա ասաց, որ մեկ շաբաթից խտացրած անասնակերերի արտադրությամբ է զբավելու։

Հարցին, թե ինչու է հրաժարական տվել ընտրություններից անմիջապես հետո, Հարությունյանը պատասխանեց, որ դա ընդամենը զուգադիպություն է, իրեն որևէ մեկը չի ուղղորդել։

«Դեռ վեց ամիս առաջ էր ցանկություն առաջացել, ուղղակի համընկավ ընտրությունների հետ։ Ինձ որևէ մեկը չէր կարող ստիպել հրաժարական տալ»,- նշեց նա։

Անդրանիկ Հարությունյանի խոսքով՝ իր համայնքում հաղթել է «Քաղաքացիական պայմանագիրը»՝ 62 %-ով։ Նիկոլ Փաշինյանի գլխավորած ուժին հաջորդել է «Հայաստան» դաշինքը՝ 20 %-ով։

Անդրանիկ Հարությունյանը հավաստիացրեց, որ ինքը երբևէ կուսակցական չի եղել և ընտրությունների ժամանակ էլ որևէ քաղաքական թիմի չի սատարել։

Այժմ համայնքի ղեկավարի ժամանակավոր պաշտոնակատարը Հարություն Սարգսյանն է. նա, Անդրանիկ Հարությունյանի տեղեկություններով՝ «Քաղաքացիական պայմանագիր» կուսակցության ակտիվ սատարողներից է։

Նոր Խաչակապ համայնքի ղեկավարի նախկին ժամանակավոր պաշտոնակատար Մարտիրոս Տռուզյանի հրաժարականի պատճառը նույնպես գյուղատնտեսական բիզնես սկսելն է։ Մարտիրոս Տռուզյանը ԺՊ էր մեկ տարի, նա հրաժարական է տվել հունիսի 25-ին։

Նոր Խաչակապում 38 %-ով հաղթել է Ռոբերտ Քոչարյանի գլխավորած «Հայաստան» դաշինքը։ Երեք տոկոսի տարբերությամբ դաշինքին հաջորդել է «Քաղաքացիական պայմանագիրը»։

Մարտիրոս Տռուզյանի խոսքով՝ ինքը կուսակցական չէ, սակայն սատարում է «Քաղաքացիական պայմանագրին»․ «Ես նախորդ տարի դիմել եմ կուսակցությանն անդամագրվելու համար, բայց դեռ չեն հաստատել»։

Մարտիրոս Տռուզյանին փոխարինած ժամանակավոր պաշտոնակատարն անկուսակցական է։

Սարալանջի 31 տարվա համայնքապետ Արթուր Սարոյանն էլ, իր ներկայացմամբ, առողջական խնդիրների պատճառով է հրաժարական տվել։

«Առողջապես ուղղակի ի վիճակի չեմ աշխատել։ Ինձ ոչ մարզպետը, ոչ էլ որևէ մեկը չէր կարող ասել՝ հրաժարական տուր։ Ես իմ կամքով դիմում եմ գրել»,- ասաց նա։

Նախկին համայնքապետի խոսքով՝ 50 տնտեսություն ունեցող Սարալանջ համայնքից ընտրություններին մասնակցել է 92 ընտրող։ Հաղթել է «Պատիվ ունեմ» դաշինքը՝ մի քանի ձայնով գերազանցելով «Քաղաքացիական պայմանագրին»։

Արթուր Սարոյանը հավելեց, որ ինքը քաղաքական ոչ մի ուժի չի հարում։

Լոռու երեք գյուղերի նախկին վարչական ղեկավարներն էլ մեզ հետ զրույցում նշեցին, որ մարզպետի հետ վերջին անգամ հանդիպել են ընտրություններից շատ առաջ՝ գործնական հարցերով։