Ռոբերտ Քոչարյան. Մենք դեմ ենք վենդետաներին, բայց կողմ ենք արդարադատությանը

Մենք չենք պատրաստվում վենդետա իրականացնել, մենք պատրաստվում ենք հանգստություն բերել ժողովրդին: Այս մասին Ջերմուկի բնակիչների հետ հանդիպմանը հայտարարեց բանակի երկրորդ նախագահ, «Հայաստան» դաշինքի առաջնորդ Ռոբերտ Քոչարյանը:

«Մենք վենդետան չենք ընդունում: Մենք ասում ենք` ոչ վենդետաներին, բայց ասում ենք այո արդարադատությանը»,- շեշտեց Քոչարյանը:

«Ասում են, որ մենք վենդետա կհայտարարենք գյուղապետերին, որոնց հետապնդում են երկու տարի, ընդ որում` 90 տոկոսով անհիմն: Նրանք իրենց համար քաղաքական մահակ են ստեղծել, գյուղապետերին իրենց անօրինական կամքը պարտադրելու համար: Երկիրը, ժողովուրդը չի կարող ստեղծագործաբար աշխատել, եթե այն մասնատված է եւ վերեւից թշնամանք է պարտադրվում: Մեզ այդպիսի իշխանություն պետք չէ: Մեզ իշխանություն է պետք, որը հանդուրժողականություն, խաղաղություն կբերի, հավատացեք իմ փորձին»,- ասաց նախկին նախագահը` շեշտելով, որ իր թիմը մտադիր է դադարեցնել միգրացիան, լուծել գործազրկության եւ անվտանգության խնդիրները սահմանին:

Ինչպես շեշտեց Քոչարյանը, առնվազն 5000 զոհվածի եւ 10.000 վիրավորի հարազատներն ունեն վենդետայի բարոյական իրավունք: «Արհեստականորեն հրահրված պատերազմ, եւ պարտվելու համար արվել է ամեն ինչ»,- հիշեցրեց նախկին նախագահը` հավելելով, որ իրենց տները կորցրած հազարավոր մարդիկ ունեն նույն իրավունքը: «Բայց մեր պարտականությունն է թույլ չտալ դա,- շարունակեց Քոչարյանը:- Բայց արդարությունը պետք է անխուսափելի լինի»: