Պահուստային ֆոնդը ծանրաբեռնված է. փող չկա, ստիպված պատվաստանյութի փողն են օգտագործում այլ նպատակի համար

Առողջապահության նախարարությունը դիմել է Կառավարությանը 2021 թվականի բյուջեում փոփոխություն կատարելու և նախարարությանը հավելյալ 1 միլիարդ 100 միլիոն դրամ հատկացնելու համար։

Գումարն Առողջապահության նախարարությանն անհրաժեշտ է անհետաձգելի բժշկական օգնության և ուռուցքաբանական և արյունաբանական հիվանդությունների բժշկական օգնության ծառայությունների համար անհրաժեշտ հատկացումներն անելու նպատակով՝ պայմանավորված դեպքերի ավելացմամբ։

Մասնավորապես, «Ուռուցքաբանական և արյունաբանական հիվանդությունների բժշկական օգնության ծառայություններ» միջոցառումն առաջարկվում է ավելացնել 800,0 մլն դրամով, իսկ արդյունքային ցուցանիշները` 4000 դեպքով:

«Անհետաձգելի բժշկական օգնության ծառայություններ» միջոցառումն առաջարկվում է ավելացնել 300,0 մլն դրամով, իսկ արդյունքային ցուցանիշները` 250 դեպքով, իսկ դեպքերի ավելացումը պայմանավորված է գլխուղեղի սուր կամ ենթասուր իշեմիկ ինսուլտի բուժման դեպքերի քանակի ավելացմամբ:

Ֆինանսների նախարարությունից հայտնել են, որ Կառավարության պահուստային ֆոնդն արդեն իսկ ծանրաբեռնված է, ուստի առաջարկում են պահանջվող լրացուցիչ ծախսերն իրականացնել Առողջապահության նախարարությանը հատկացված բյուջեն վերանայելու և ծախսային միջոցառումների առաջնահերթությունների վերանայման միջոցով։

Առողջապահության նախարարությունում էլ որոշել են, որ ոչ առաջնային է

կորոնավիրուսային վարակի (COVID) կանխարգելմանն ուղղված` պատվաստանյութի ձեռքբերման համար հատկացված ծախսը, այն կարելի է կրճատել, և ուռուցքաբանական և անհետաձգելի այլ հիվանդությունների դեպքերի աճով պայմանավորված հավելյալ գումարը՝ 1 միլիարդ 100 միլիոն դրամը, վերցրել են պատվաստանյութի համար հատկացված գումարից: