Հայաստանն իր ձեռքերը ծալած է նստում, խոսում է բանակի մասին՝ անհայտ ձեւակերպումներով. Աննա Գրիգորյան

Այս մասին այսօր՝ ապրիլի 23-ին, դատարանի բակում լրագրողների հետ զրույցում ասաց ԱԺ անկախ պատգամավոր Աննա Գրիգորյանը։

Նշենք, որ Երեւան քաղաքի Ավան եւ Նոր Նորք վարչական շրջանների ընդհանուր իրավասության դատարանում՝ նախագահությամբ դատավոր Մանվել Շահվերդյանի, քննվում է Մեղրիի քաղաքապետ Մխիթար Զաքարյանին ձերբակալելու իրավաչափության դեմ պաշտպանների բողոքը։

«Մարդուն մեղադրում են խուլիգանության մեջ այն դեպքում, երբ վերջինս իջել է իր բնակիչների մոտ եւ փորձել է հասկանալ՝ ինչ է կատարվում՝ հնարավոր բախումները կանխելու համար։ Այս մարդկանց նկատմամբ բացառապես քաղաքական հետապնդում է, որն ուղեկցվում է նաեւ ձերբակալություններով, ստորացումներով, անհամաչափ ուժի կիրառմամբ։ Սա պետք է դատապարտելի լինի բոլորի կողմից։ Ես ակնկալում է, որ մի շարք պատգամավորներ այսօր այստեղ կլինեին՝ հստակ քաղաքական եւ իրավական գնահատականներով։ Ինձ համար այնքան տարօրինակ է, երբ երկրի ղեկավարը մի մարզ է գնում եւ ասում է՝ խոնարհվում եմ ձեր առաջ, սիրում եմ ձեզ, դրան հաջորդում են ծափահարություններ, բայց երբ մի մարզ է գնում, երբ իրենից բողոք են արտահայտում, նա նրանց խուլիգան է անվանում։ Դա նույն ժողովուրդն է, այդ մարդիկ ՀՀ քաղաքացիներն են, այդ ի՞նչ որակումներ են։ Կարծում եմ՝ եւ՛ երկրի ղեկավարը, եւ՛ իշխանության ներկայացուցիչները պետք է շատ ավելի մեծ հարգանք ցուցաբերեն ՀՀ քաղաքացիների նկատմամբ՝ անկախ նրանից, թե ինչպիսի քաղաքական եւ քաղաքացիական հայացքներ ունեն վերջիններս»,- նշեց նա։

Պատգամավորի խոսքով՝ ՀՀ սահմաններն այսօր ամբողջությամբ անվտանգ չեն. «Անվտանգային համակարգն այսօր, ինչպես ամբողջ ՀՀ-ում, այնպես էլ Սյունիքում, գոյություն չունի։ Այո, մեր սահմաններն ամբողջությամբ անվտանգ չեն, որովհետեւ մեծ հաշվով այն սահմանը, որը երկարել էր 500 կմ-ից ավելի, դեռեւս չեն կանգնում հայ սահմանապահները։ առանձին կետեր, իհարկե, կան, բայց հենակետերը բավարար չափով չեն, որ ապահովեն ամբողջ անվտանգությունը։ Այնտեղ կան նաեւ ռուս խաղաղապահներ, բայց ստացվում է, որ Հայաստանն իր ձեռքերը ծալած է նստում, խոսում է բանակի մասին՝ անհայտ ձեւակերպումներով, հույսն ամբողջությամբ դնում է Ռուսաստանի վրա։ ՀՀ քաղաքացին հստակ պահանջներ ունի իր երկրի ղեկավարությանը, եւ համապատասխան վերաբերմունք է ակնկալում իր անվտանգության վերաբերյալ»։

Լրագրողի դիտարկմանը, եթե Նիկոլ Փաշինյանը գիտեր, թե սյունեցիներն իրեն ինչպես են դիմավորելու, ինչո՞ւ գնաց, Գրիգորյանն ասաց. «Ես չեմ կարող ասել, որ ամբողջ Սյունիքն է պահանջում Փաշինյանի հրաժարականը, կան մարդիկ, որոնք աջակցում են։ Վստահ եմ, որ կան բազմաթիվ մարդիկ, որոնք բողոքում են։ Քանի որ գալիք ընտրություններում իր հիմնական մարտավարությունը լինելու է նորից սեւերի եւ սպիտակների բաժանումը, հիմա գնացել ու ասում է՝ տեսեք, սեւերն էլի գալիս են, ճնշում են, էլի նախկինները գալու են։ Փորձում է ձայներ հավաքել այն մարդկանց մոտ, որոնք դեռեւս չեն կողմնորոշվել»։

Անդրադառնալով իմքայլական պատգամավորների այն պնդումներին, թե Սյունիքում անվտանգ է, Գրիգորյանն արձագանքեց. «Երբ պատգամավորը գնա Սյունիք, կարող է դրա մասին իմանալ։ Այլ բան է, երբ նա Սյունիք գնալով չի ուզում նման պնդում անել։ Ինքը Սյունիք գնալիս չի՞ տեսնում, երբ ադրբեջանցին հենց ճանապարհի վրա կանգնած է՝ զինված։ Մոռացե՞լ եք, որ 5 ամիս առաջ այդ նույն ադրբեջանցիներն էին սպանում մեր հայորդիներին. այդ ինչքա՞ն կարճ հիշողույուն ունեն այդ պատգամավորները։ Ցավում եմ, որ հատկապես Սյունիքից ընտրված պատգամավորներն են նման կարծիք արտահայտում»։