Շարունակվում է հանցագործության մասին հաղորդում ներկայացրած անձին չպատասխանելու արատավոր պրակտիկան. ՄԻՊ-ի անդրադարձը

Դեռևս փետրվարի 9-ին 168.am-ի «Ռեվյու» հաղորդաշարի տաղավարում, խոսելով ենթադրյալ սահմանադրական կարգի տապալման գործով դատավոր Աննա Դանիբեկյանին ներկայացրած ինքնաբացարկի հիմքերի մասին, այդ գործով անցնող նախկին փոխվարչապետ Արմեն Գևորգյանի պաշտպան Էրիկ Ալեքսանյանն ասել էր, որ իրենք դատավորի հետ ունեն իրավական վեճ:

«Մենք այն կարծիքին ենք, որ Աննա Դանիբեկյանը կատարել է հանցագործություն, մենք վեճ ունենք, և անկողմնակալ դիտորդի տեսանկյունից՝ Դանիբեկյանը չի կարող ընկալվել՝ որպես անկողմնակալ, օբյեկտիվ ու անաչառ դատարան»,- նշել էր փաստաբանը՝ հավելելով, որ վտանգ կա այս գործի դրական ելքի դեպքում Դատախազության կողմից Վերաքննիչ դատարան դիմելու դեպքում վերջինիս կողմից այն կրկին Առաջին ատյանի դատարան վերադարձնելու՝ այն պատճառաբանությամբ, որ գործը քննվել է ապօրինի դատարանում:

Էրիկ Ալեքսանյանն ասել էր նաև, որ այս իրողության պայմաններում կողմնակալ դիտորդի մոտ չի կարող ստեղծվել տպավորություն, որ նա անկողմնակալ կարող է լինել սույն գործով:

«2020թ. հունիսի 9-ին պետք է կայանար Մարտի 1-ի գործով հերթական դատական նիստը: Մենք միջնորդություն էինք ներկայացրել՝ դատական նիստը հետաձգել՝ պայմանավորված այն հանգամանքով, որ Արմեն Գևորգյանի կնոջ՝ Թամարա Գևորգյանի մոտ հայտնաբերվել էր Քովիդ-19. Ու Արմեն Գևորգյանը, լինելով կոնտակտավոր, չի կարողանալու մասնակցել այդ դատական նիստին: Միևնույն ժամանակ՝ դատարանին խնդրել էինք, որպեսզի դռնբաց դատական քննության պայմաններում Թամարա Գևորգյանի մոտ Քովիդ-19 հայտնաբերվելու փաստը չհրապարակվի՝ այն բժշկական գաղտնիք լինելու պատճառաբանությամբ: Հետագայում մամուլից տեղեկացանք, որ նիստը հետաձգվել է, սակայն դատարանը, այնուամենայնիվ, այդ տեղեկատվությունը հրապարակել է»,- խնդրի էությանն էր ծանոթացրել Էրիկի պաշտպանը:

Նրա խոսքով՝ մինչև հանցագործության մասին հաղորդում ներկայացնելը փորձել են պարզաբանում ստանալ դատարանից, թե ինչով է պայմանավորված դատարանի նման վարքագիծը, քանի որ իրենք ուղղակի արգելք էին սահմանել այդ տեղեկատվության հրապարակման համար:

«Մեզ այդ ժամանակ դատավորի աշխատակազմից հայտնեցին, որ Աննա Դանիբեկյանը հրաժարվում է առհասարակ որևէ պարզաբանում տալ, ու դա արեցին շատ կոպիտ ու անհասկանալի ձևով: Ի սկզբանե հաղորդում ներկայացնելու միտում, ցանկություն չկար, բայց այդ վարքագիծը տարակուսանք առաջացրեց մեր մեջ: Եթե Աննա Դանիբեկյանը որևէ կերպ բացատրեր իր վարքագիծը, մենք հաղորդում չէինք ներկայացնի, բայց քանի որ մենք նման կոպիտ արձագանք ստացանք, դիտարկելով դա որպես հանցագործություն, որովհետև բժշկական գաղտնիքի հրապարակումը քրեական հանցագործություն է, դիմեցինք գլխավոր դատախազություն»,- նշել էր Էրիկ Ալեքսանյանը:

Պաշտպանը բժշկական գաղտնիքի հրապարակման առնչությամբ հաղորդում էր ներկայացրել հանցագործության մասին, սակայն այդ հաղորդումն ըստ էության չէր էլ քննարկվել:

Հանցագործությունների վերաբերյալ ֆիզիկական անձանց հաղորդումները չքննարկելու և հաղորդումն ընդունող մարմնի հայեցողության պրակտիկային իր տարեկան զեկույցում անդրադարձել էր նաև ՀՀ Մարդու իրավունքների պաշտպանը:

Ըստ ՄԻՊ զեկույցի՝ փաստաբանը Պաշտպանին հասցեագրված բողոքով հայտնել է, որ քրեական գործի դատաքննության ընթացքում հերթական դատական նիստը հետաձգելու խնդրանքով միջնորդություն է ներկայացրել դատարան՝ նկատի ունենալով, որ Նախագահի աշխատակազմի նախկին ղեկավար Արմեն Գևորգյանի կնոջ՝ Թամարա Գևորգյանի մոտ ախտորոշվել է կորոնավիրուսային հիվանդություն: Փաստաբանը տեղեկացրել է, որ դատարանն առանց անձի համաձայնության, դռնբաց դատական նիստի ընթացքում հրապարակել է ներկայացված միջնորդության բժշկական գաղտնիք համարվող նշված տեղեկությունը: Ըստ փաստաբանի՝ բժշկական գաղտնիք համարվող տեղեկության հրապարակման վերաբերյալ հանցագործության մասին հաղորդում է ներկայացրել Գլխավոր դատախազություն, սակայն դրա վերաբերյալ նյութեր չեն նախապատրաստվել, Քրեական դատավարության օրենսգրքի 181-րդ հոդվածով նախատեսված որոշում չի կայացվել: Դրանից բացի, փաստաբանը նշել է, որ այդ տեղեկությունը դատարանի կողմից հրապարակելուց հետո ստացել է լայն տարածում:

«Թամարա Գևորգյանը սկսել է ստանալ նամակներ ու հեռախոսազանգեր, հարցումներ իրեն ճանաչող ու չճանաչող մարդկանցից առողջական վիճակի վերաբերյալ, ինչն իր հերթին՝ հոգեճնշող ազդեցություն է ունեցել: Այս իրադարձությունները եղել են նոր կորոնավիրուսային (COVID-19) վարակի տարածման սկզբնական շրջանում, երբ հասարակության մոտ կային հիվանդության վերաբերյալ խարանին բնորոշ պատկերացումներ: Դրա պատճառով նաև անկում է ապրել իր մասնագիտական բժշկական գործունեությունը: Մասնավորապես, այդ տեղեկատվության հրապարակման արդյունքում խիստ նվազել է նրա մոտ այցելող պացիենտների թիվը:

«Այս ամենը Մարդու իրավունքների պաշտպանի հետ առանձնազրույցի ընթացքում հաստատել է նաև Թամարա Գևորգյանը: Փաստաբանը նույն հաղորդումը ներկայացրել է Մարդու իրավունքների պաշտպանին, բարձրացված հարցի վերաբերյալ անհրաժեշտ պարզաբանումներ ստանալու և համապատասխան ընթացք տալու համար այն ուղարկվել է քրեական հետապնդման մարմին, Քրեական դատավարության օրենսգրքի 180-181-րդ հոդվածներով սահմանված կարգով նախապատրաստվել են նյութեր, կայացվել է որոշում: Պաշտպանին ներկայացված բողոքները փաստում են, որ հանցագործության մասին հաղորդումը որպես ահազանգ դիտարկելու, ստուգման ընթացակարգը եզրակացությամբ ավարտելու, հաղորդում ներկայացրած անձին չպատասխանելու կամ գրությամբ պատասխանելու անընդունելի պրակտիկան շարունակվում է»,- գրել էր ՀՀ ՄԻՊ Արման Թաթոյանն իր տարեկան զեկույցում: