ԵԱՀԿ ՄԽ ձեւաչափը պետք է հետագայում եւս առաջատար դեր խաղա ղարաբաղյան հակամարտության կարգավորման գործընթացում. ՌԴ ԱԳՆ

Հենց ԵԱՀԿ Մինսկի խմբի համանախագահների «եռյակի» մշակած կարգավորման բազային սկզբունքներն են դրված 2020 թվականի նոյեմբերի 9-ին Ռուսաստանի, Ադրբեջանի եւ Հայաստանի ղեկավարների հայտարարության հիմքում՝ Լեռնային Ղարաբաղի հակամարտության գոտում հրադադարի եւ բոլոր ռազմական գործողությունների դադարեցման մասին: Այս մասին «Մոսկվա-Բաքու» լրատվական գործակալության հետ հարցազրույցում ասել է Ռուսաստանի Դաշնության արտաքին գործերի փոխնախարար Անդրեյ Ռուդենկոն՝ պատասխանելով այն հարցին, թե Ռուսաստանն այսօր ինչպիսի՞ն է տեսնում ԵԱՀԿ ՄԽ համանախագահների դերը Լեռնային Ղարաբաղի հակամարտության կարգավորման գործընթացում՝ հաշվի առնելով, որ հակամարտության լուծման գործում կոնկրետ արդյունքների հանգեցրեց Ռուսաստանի միջնորդական դերը:

Դիվանագետի խոսքով՝ 2020 թվականի սեպտեմբեր-նոյեմբեր ամիսներին Լեռնային Ղարաբաղում իրավիճակի սրման ընթացքում Ռուսաստանը ԵԱՀԿ Մինսկի խմբի մյուս համանախագահների հետ միասին (ԱՄՆ եւ Ֆրանսիա) ակտիվորեն աշխատել է արյունահեղության դադարեցման ուղղությամբ: 2020 թվականի հոկտեմբերին երեք երկրների նախագահների եւ արտաքին գործերի նախարարների մակարդակով արվեցին կարեւոր հայտարարություններ՝ կոչ անելով անհապաղ դադարեցնել ռազմական գործողությունները եւ հակամատող կողմերի միջեւ վերսկսել բանակցությունները:

«Հենց ԵԱՀԿ ՄԽ համանախագահների «եռյակի» կողմից մշակված կարգավորման հիմնական սկզբունքներն են դրված 2020 թվականի նոյեմբերի 9-ին Ռուսաստանի, Ադրբեջանի եւ Հայաստանի ղեկավարների հայտարարության հիմքում՝ Լեռնային Ղարաբաղի հակամարտության գոտում հրադադարի եւ բոլոր ռազմական գործողությունների դադարեցման մասին: Համոզված ենք, որ ԵԱՀԿ ՄԽ համանախագահների ձեւաչափը պետք է հետագայում ես առաջատար դեր ունենա ճգնաժամի հետեւանքները հաղթահարելու, հակամարտության հաստատուն եւ քաղաքական-դիվանագիտական ճանապարհով երկարաժամկետ կարգավորման ուղիների որոնման գործում»,- նշել է Ռուդենկոն: