«Իմքայլականները» չեն կարող իրենց դավաճանությունը, անգործությունն անընդհատ փորձել փաթաթել նախկինների, սրա-նրա վրա․ իրենք են պատասխանատու ՀՀ-ում ստեղծված այս իրավիճակի համար․ Իշխան Սաղաթելյան

Հանրային արձագանքները մեզ հուշում են, որ բավականին բազմամարդ հանրահավաք է լինելու։ Այս մասին Երևանի Ազատության հրապարակում լրագրողների հետ զրույցում ասաց ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով «Հայրենիքի փրկության շարժման»՝ փետրվարի 20-ին կայանալիք հանրահավաքին։

Հարցին՝ Շարժման լիդերները ներկա լինելո՞ւ են, Սաղաթելյանը պատասխանեց՝ այո։ Դիտարկմանը, թե խոսակցություններ կան, որ որոշակի լարվածություն կա կուսակցությունների ղեկավարների միջև, ՀՅԴ ԳՄ ներկայացուցիչը պատասխանեց․ «Այդ տեղեկությունները սովորաբար դուք տարածում եք, մենք հերքում ենք։ Չկա նման բան, նորմալ, կառուցողական, գործնական հարաբերություններ ունենք»։

Նրա խոսքով՝ երեկ «Հայրենիքի փրկության շարժման»՝ 6 լիդերների հանդիպմանը քննարկվել են ընթացիկ հարցեր՝ Շարժման վերաբերյալ․ «Բնական հանդիպումներ են, որ պարբերաբար տեղի են ունենում տարբեր ձևաչափերով»։

Հարցին՝ կարելի՞ է ասել, որ փետրվարի 20-ի հանրահավաքի մեկնարկից հետո գործողությունների հաջորդականությունը բերելու է նրան, որ գործող իշխանությունը հեռանա, ՀՅԴ ԳՄ ներկայացուցիչն արձագանքեց․ «Մեր ամբողջ նպատակը հենց դա է։ Հանրահավաքներն ինքնանպատակ չեն, մեր գլխավոր նպատակն այս իշխանություններին օր առաջ, րոպե առաջ հեռացնելն է, և մեր բոլոր գործողությունները, այդ թվում՝ փետրվարի 20-ի հանրահավաքն ու դրանից հետո տեղի ունեցող գործողությունները բխելու են այդ նպատակից»։

Նա նշեց, թե հանդիպումների ընթացքում քաղաքացիներն իրենց տարբեր առաջարկներ են ներկայացնում, որոնք արձանագրվում են, քննարկվում՝ իրականացնելու համար։ «Նրանք պահանջում են րոպե առաջ հեռացնել այս իշխանություններին։ Երբ իշխանական պատգամավորներից մի քանիսն ասում են՝ իրենց պահանջում են մնալ իշխանության, առաջարկում եմ գալ, շփվել իշխանությունների հետ և տեսնել՝ իրենց մասին ինչ են ասում մեր քաղաքացիները»,-ասաց նա։

Ինչ վերաբերում է իշխանության հայտարարությանը, թե վերջինիս հրաժարականի հանրային պահանջ չկա, Սաղաթելյանն ասաց․ «Հանրային պահանջի հարցումն իրենք արել են կա՛մ իրենց խմբակցության ներսում, կա՛մ Ադրբեջանի խորհրդարանում: Ես առաջարկում եմ, որ Նիկոլ Փաշինյանը փաստի, որ 850,000 ընտրող ունի, կտեսնենք՝ քանի ընտրող ունի։ Երբ ասում է՝ հասարակական պահանջ չկա, դրանով վիրավորում է մեր ժողովրդին, հասարակությանը։ Չի կարող հայ մարդը հանդուրժել այն իշխանությանը, որը մեր պետությունը կանգնեցրեց աղետի եզրին։ Հասարակական պահանջ կա, և այս իշխանությունը պետք է հեռանա»։

Դիտարկմանը, թե իշխանական պատգամավորները նշում են, թե նախկին 10 տարիները եղել են հակաղարաբաղյան, քանի որ այդ ընթացքում Արցախում որևէ ներդրում չի եղել, Սաղաթելյանն արձագանքեց․ ««Իմքայլականները» չեն կարող իրենց դավաճանությունը, անգործությունն անընդհատ փորձել փաթաթել նախկինների, սրա-նրա վրա։ Իրենք են ամբողջապես պատասխանատու մեր երկրում ստեղծված այս իրավիճակի համար»,-ասաց նա։