Իշխանությունը խոստովանում է, որ նման բան ստորագրել է, քավորն էլ Վաղարշակ Հարությունյանն է. Բագրատյան

«Իշխանությունը խոստովանում է, որ նման բան ստորագրել է, քավորն էլ Վաղարշակ Հարությունյանն է։ ՊՆ-ն չգիտի, որ GPS-ով սահման չեն գծում»,- այս մասին Ազատության հրապարակում ասաց Հրանտ Բագրատյանը, հավելելով, որ ինքը կանխատեսում էր Սյունիքի մարզում ադրբեջանական կողմի սադրանքները։ Բագրատյանն ավելի վաղ էր նշել, որ սահմանային փոփոխությունները հետագայում բերելու են ավելի լուրջ խնդիրների։ Այսօր էլ տեղեկությունը հաստատվեց, որ ադրբեջանցիները շարունակ կրակում են Ագարակ գյուղի ուղղությամբ՝ մեկ կմ հեռավորությունից։

Բագրատյանն ավելի վաղ պատմել էր Սյունիք կատարած այցի մասին, որտեղ բնակելի տներից մի քանի մետր հեռավորության վրա կանգնած են եղել ադրբեջանցի զինվորները։ Բագրատյանը վստահեցնում է, որ հարյուր հազարավոր կիլոմետրեր են նվիրվել թշնամուն ՀՀ տարածքից։

«Բնակարանի բալկոն անգամ չես ուզում դուրս գաս, որ լվացք կախես»,-ասաց Բագրատյանը։

Բագրատյանն անդրադառնալով ընտրություններին, նշեց, որ ժողովուրդը պետք է հասկանա, որ խորհրդարանում պետք է ձևավորել մինչև 6 ուժ, ինչը կլինի իրական դեմոկրատիա։

«Պառլամենտը չպետք է լինի 85 տոկոս մեկ ուժից բաղկացած։ Նիկոլ Փաշինյանը կկեղծի ընտրությունները, որովհետև գիտի, որ եթե մենք եկանք իշխանության, ինքը կձերբակալվի»։