Եռակողմ հանդիպմանը մեր վարչապետի նկարը դնեին, գուցե ավելի մեծ արդյունք կլիներ․ Ռոբերտ Քոչարյան

Ես այդ հանդիպումը եռակողմ չէի համարի, այնտեղ եղել է երկուսուկես կողմ, կամ միգուցե 2 եւ մեկ քառորդ։ Այս մասին մի քանի լրատվամիջոցների հետ հարցազրույցում ասել է ՀՀ երկրորդ նախագահ Ռոբերտ Քոչարյանը՝ պատասխանելով հունվարի 11-ի եռակողմ հանդիպման արդյունքների մասին հարցին։

«Մեր վարչապետի նկարը դնեին, գուցե ավելի մեծ արդյունք կլիներ, գոնե խորհրդավորության ինչ-որ տպավորություն կգործեր։ Ինչ վերաբերում է տրանսպորտային ենթակառուցվածքներին․ կարգավորման բոլոր տարբերակներում ենթադրվում էր, որ կոմունիկացիաները պետք է բացվեն, շրջափակումը վերացվի։ Դա կարգավորման վերջին ակորդը պետք է լիներ։ Հիմա Ադրբեջանն ուժով լուծեց տարածքների հարցը, մի բան էլ ավելի, հիմա ոչ թե 7 շրջան, այլ 9։ Մենք, ըստ էության, չունենք ոչինչ, որի դիմաց ինքը պետք է կարգավիճակի հարց քննարկի։ Սա նշանակում է մեկ բան․ Ադրբեջանը համարում է հարցը լուծված, եւ մենք մտել ենք հարցի կարգավորման վերջին փուլի մեջ։ Եվ հայտարարելու են՝ ի՞նչ կարգավիճակ, ի՞նչ բան, մենք հարցը լուծել ենք։ Եվ փորձելու են այնպիսի իրավիճակներ ստեղծել Արցախի համար, որ կամ կհայաթափվի կամ մաս-մաս ինչ-որ ձեւով ընդունի Ադրբեջանի իշխանությունը այդ տարածքում։ Եվ մենք, իհարկե, պետք է դրան դիմակայենք։ Բայց այն հայտարարությունը, եւ այն, որ Ադրբեջանը դրան գնում է, սա է ենթադրում։ Փորձում են ներկայացնել այդ ճանապարհի կարեւորությունը, առաջինը՝ իհարկե, լավ է, որ ճանապարհը բացվում է, բայց տեսեք, Հայաստանում 1998-2008 թվականներին ես նախագահ եմ եղել, մեր տնտեսությունն աճել է տարեկան միջինը 10,5 տոկոսով, վերջին 7 տարին եղել է 12,5 տոկոս, մենք մտնում էինք աշխարհի ամենաարագ զարգացող երկրների տասնյակի մեջ, մի քանի տարի՝ հնգյակի մեջ, մեզ Համաշխարհային բանկն անվանում էր Կովկասյան վագր՝ այդ զարգացման տեմպերի համար, բայց ճանապարհը փակ էր, Թուրքիան մեզ եւս շրջափակում էր։ Հիմա թող մեզ հեքիաթներ չպատմեն, թե ճանապարհը բացվի՝ կսկսենք լավ ապրել, եւ այլն, եւ այլն։

Հիմա՝ ի՞նչ հետեւանքներ կարող են լինել ճանապարհի բացման հետ կապված։ Նախ, մեծ հարց է՝ բացվելու է, թե ոչ։ Մեղրիի հատվածը հսկելու են ռուսները, մնացած 850 կմ-ը, որից 47 կմ-ն է Մեղրիի հատվածը, մենք ոչ մի ազդեցություն չենք ունենալու։ Ադրբեջանը կարող է այնպիսի սակագնային քաղաքականություն վարել, որ մեզ համար դրանից օգտվելը դառնա անիմաստ։ Ասում է՝ բացել եմ, օգտվեք, բայց քո վերահսկողության տակ չի գտնվում։ Այդպիսով, ստանում է եւս մեկ լծակ, իսկ մենք՝ հույս, որ դա կաշխատի, բայց չունենք լծակ այդ պրոցեսի վրա ազդելու համար․ տարբերությունը դրա մեջ է։ Այն ժամանակ շրջափակումը մեզ նույնիսկ օգնեց մեր գյուղատնտեսությունը եւ վերամշակող արդյունաբերությունը զարգացնելո համար։ Երկաթուղու աշխատանքի արդյունքում ինչ կարող է ստացվել, մեր գյուղատնտեսությունն ու վերամշակող արդյունաբերությունը մրցակցության մեջ է մտնում Ադրբեջանի հետ, որն ունի էժան վառելիք, իսկ Թուրքիան հսկայական ծավալներով սուբսիդավորում է գյուղատնտեսությունը։ Եվ կարճաժամկետ եւ միջնաժամկետ հեռանկարում սա հարվածելու է մեր գյուղատնտեսությանն ու վերամշակողին։ Սա պետք է մենք գիտակցենք։ Պետք են լինելու կտրուկ քայլեր մեր շուկան պաշտպանելու համար։ Այս իշխանությունն ընդունակ չէ նման քայլերի։ Մենք այնպիսի խոչընդոտներ էինք ստեղծում թուրքական ապրանքների համար, որ մեզ օգնեց իմպորտի փոխարինման գործընթացում, սննդի արդյունաբերությունը ծաղկում ապրեց, որը գյուղատնտեսության շարունակությունն է։ Ամեն ինչ չէ, որ անում էինք հրապարակային։ Այնպես չէ, որ ճանապարհների բացվելը վատ է, բայց հստակ քայլեր են պետք, այլապես բազմաթիվ ֆերմերային տնտեսություններ կկորցնեն իրենց իմաստը։ Եթե հանդիպեք մաքսային նախկին ղեկավարների հետ, նրանք ձեզ կպատմեն, թե ինչպես ենք քայլ առ քայլ զարգացրել այդ ոլորտը»,– ասել է Ռոբերտ Քոչարյանը։

ՀՀ 2-րդ նախագահը պատմել է, որ Քի Վեսթի բանակցություններով Ղարաբաղը միջանցքով միացվում էր Հայաստանին, ընդ որում, միջանցքը նույն կարգավիճակը պետք է ունենար, ինչ Արցախը, իսկ Ադրբեջանը ստանում էր միայն սուվերեն ճանապարհ դեպի Նախիջեւան։