Այս շարժումը կանգ չի առնելու, քանի դեռ դավաճանը գտնվում է իշխանության. Իշխան Սաղաթելյան

Ես կարծում եմ՝ դա ԼՀԿ պատգամավոր Գեւորգ Գորգիսյանի ցանկությունն է եղել, եւ դրանից հետո էլ պարզաբանում տվեց։ Այս մասին այսօր՝ հունվարի 15-ին, Գյումրիում հայտարարեց ՀՅԴ ԳՄ անդամ Իշխան Սաղաթելյանը՝ անդրադառնալով ԼՀԿ պատգամավոր Գեւորգ Գորգիսյանի այն խոսքին՝ եթե ԱԺ-ում առաջադրվի Էդմոն Մարուքյանի՝ վարչապետ դառնալու թեկնածությունը, ապա ԲՀԿ-ն կողմ կքվեարկի։

«Եթե իրենք իրենց նպատակի մեջ ազնիվ են եւ ուզում են՝ այս մարդը հեռանա, դրա ուղղությամբ պետք է հստակ, հետեւողական քայլեր իրականացնեն։ Այս շարժումը չի կանգնելու, քանի դեռ այս դավաճանը գտնվում է իշխանության, եւ մենք անելու ենք ամեն ինչ այդ ուղղությամբ։ Մենք շարունակում ենք մարզային այցելությունները։ Այո, այս 10 օրվա ընթացքում դադար է եղել։ Մենք առաջին օրն ենք հայտարարել, որ այս մարդու մեկ օր ավել մնալը կորուստ է մեր պետության համար։ Մենք երկու ամիս փողոցից չենք գնացել, նաեւ առաջիկայում եւս չենք գնալու»,- նշեց նա եւ հավելեց, որ խնդիրը հետեւյալն է՝այս պահանջը պետք է վերածվի համաժողովրդական պայքարի»։

Սաղաթելյանի խոսքով՝ այն մարդիկ, որոնք կարծում են՝ Փաշինյանը պետք է հեռանա, ապա պիտի միանան իրենց շարժմանը. «Այս իմաստով պետք է իրոք Հայաստանի Հանրապետության գիտակից,արժանապատիվ քաղաքացիները իջնեն փողոց, միանան մեզ։ Կամ նրանք, ովքեր կողմնակից են այն տեսակետին, գտնում են, որ այս չարիքի կառավարությունը պետք է հեռանա, բայց մեր հարթակը չեն հավանում, թող գնան, կողքից հարթակ վերցնեն։ Կարեւորը նպատակն է, կարեւորը այս մարդուն հեռացնելն է, նորմալ իշխանություն ձեւավորելն ու մեր երկիրը փրկելը։ Մենք գնում ենք այս ճանապարհով։ Մնացածը՝ լիքը մարդ կընկնի ոտքի տակ, որոշները սադրանքների կդիմեն, թե ինչ կանեն, միեւնույնն է՝ պայքարը չի կանգնելու, որովհետեւ սա իշխանության համար պայքար է»։

Սաղաթելյանն անդրադառնալով ռազմագերիների խնդրին՝ նշեց, որ այնքան տարօրինակ է, երբ գերիների հարազատներն իրենցից են որդուն պահանջում. «Ես ինչպե՞ս հիմա դա մեկնաբանեմ։ Կամ քաղաքացիներից մեկն ասաց՝ ասել ես՝ տղայիս հարսանիքը Շուշիում կանեմ, հա, ես իմ տղայի հարսանիքը Շուշիում անելու համար ամեն ինչ անելու եմ, այսինքն այդդ հարցերին ես ինչպե՞ս արձագանքեմ։ Եթե Նիկոլ Փաշինյանը այդ 30 աջակիցը ունի Գյումրիում, հրաշալի է ամեն ինչ, եւ ես չեմ կարծում՝ իրենց թիվը ավելի է։ Ամենակարեւորը՝ մեր պայքարը հենց այդ քաղաքացիների համար է, այն քաղաքացիների, որ մեր ճանապարհը փակել էին, որովհետեւ մենք պետք է փրկենք իրենց, այսօր եթե չեն գիտակցում, վստահեցնեւմ եմ՝ վաղը կգիտակցեն»։

Անդրադառնալով ԲՀԿ-ի հետ հարաբերություններին՝ Իշխան Սաղաթելյանը հայտնեց, որ երեկ ինքը հանդիպել է ԲՀԿ առաջնորդ Գագիկ Ծառուկյանի հետ, որեւէ խնդիր չկա, պայքարը շարունակվում է. «Եթե ինչ-որ տարաձայնություններ կլինեն, դուք դրա մասի կտեղեկանաք, ես՝ որպես շարժմա համակարգող, այս պահին նման խնդիր չեմ տեսնում»։

«Մեր տեսակետը հետեւյալն է. Քանի որ երկրի թիվ մեկ պատասխանատուն, ով իրականացնում է արտաքին քաղաքականություն, ի վիճակի չէ դա անելու, եւ մեր մտահոգությունները օրեցօր ավելանում են, մեր երկիրը եւ ժողովուրդը անպաշտպան է։ Այս մարդը կառավարության նիստում ասում է՝ մեզ պետք է նոր որակի կառավարում, որպեսզի երկիրը ճգնաժամից դուրս բերվի, այսինքն պարզապես ամեն օր մեր ժողովրդին ձեռք է առնում, ուրիշ բացատրություն չկա»,- ասաց Սաղաթելյանը։