Ուիլյամ և Հարի արքայազնները պատմել են արքայադուստր Դիանայի վերջին զանգի մասին

Բրիտանական գահի թագաժառանգ Քեմբրիջի դուքս Ուիլյամը և նրա եղբայր արքայազն Հարին առաջին անգամ կպատմեն իրենց մոր՝ արքայադուստր Դիանայի մասին վավերագրական ֆիլմում, որը եթեր կհեռարձակվի ITV հեռուստաալիքում հուլիսի 24-ին, գրում է korrespondent.net-ը:

«Դիանա, մեր մայրը՝ նրա կյանքը և ժառանգությունը» ֆիլմում Ուիլյամը և Հարին մասնավորապես պատմում են նրա վերջին զանգի մասին, որը տեղի է ունեցել արքայադստեր մահվանից մի քանի ժամ առաջ:

Արքայադուստր Դիանան Փարիզից զանգել է իր որդիներին, որոնք իրենց հոր՝ արքայազն Չարլզի և թագուհի Էլիզաբեթի հետ Բալմորալ ամրոցում էին:

Արքայազն Հարին ասում է, որ ինչպես շատ դեռահասներ, նա չէր սիրում հեռախոսով խոսել ծնողների հետ, այդ պատճառով դժկամությամբ է վերցրել հեռախոսը:

«Ես չեմ կարող հիշել՝ ինչ եմ պատասխանել նրան, բայց ես իմ ողջ հետագա կյանքում ափսոսել եմ, որ այդքան կարճ տևեց այդ զրույցը: Եթե ես իմանայի, որ դա վերջինն էր, ես նրան կասեի այն ամենը, ինչ պետք է ասեի»,- ասել է արքայազնը:

Ուիլյամը նշել է, որ մոր զանգի այդ պահին նա եղբոր հետ ուրախ ժամանակ էր անցկացնում, և իրենք շտապում էին ավարտել զրույցը:

«Մենք Հարիի հետ շտապում էինք «ցտեսություն» ասել: Այդ հեռախոսազանգը դաջվել է հիշողությանս մեջ»,-նշել է Ուիլյամը:

Դիանան մահացել է Փարիզում 1997 թվականի օգոստոսիս 31-ի գիշերը ավտովթարի հետևանքով, երբ Ուիլյամը 15 տարեկան էր, իսկ Հարին՝ 12:

tert.am