ԱՄՆ կառավարությունը հաստատում է, որ TikTok-ի գնման համար Oracle-ը հայտ է ներկայացրել

ԱՄՆ կառավարությունը Oracle ընկերությունից հայտ է ստացել՝ TikTok-ի ամերիկյան օպերացիաները գնելու համար՝ այն բանից հետո, երբ ByteDance մայր-ընկերությունը մերժել է Microsoft-ի առաջարկը: Այս մասին հայտարարել է ԱՄՆ ֆինանսների նախարար Սթիվեն Մնուչինը:

Մնուչինը CNBC-ին ասել է, որ ֆինանսների նախարարությունը Oracle-ի հետ կապված առաջարկ է ստացել, եւ այն կքննարկվի կառավարական հանձնաժողովի կողմից:

Նախագահ Դոնալդ Թրամփի վարչակազմը պնդում է, որ TikTok-ը վաճառվի՝ վկայակոչելով ԱՄՆ-ում տվյալների անվտանգության հետ կապված մտահոգությունները:

Մնուչինը հրաժարվել է մանրամասներ ներկայացնել առաջարկի վերաբերյալ: «Մենք պետք է համոզվենք, որ ամերիկացիների տվյալներն անվտանգ են, հեռախոսներն անվտանգ են, եւ առաջիկա մի քանի օրվա ընթացքում բանակցություններ կվարենք Oracle-ի հետ»,- ասել է Մնուչինը:

Օգոստոսի սկզբին Թրամփը հրահանգ էր տվել, որ եթե մինչեւ սեպտեմբերի 20-ը գնման պայմանագիր չկնքվի, TikTok-ն ԱՄՆ-ում կարգելվի: