Փաշինյանը մտադիր է արգելել խաղաղ հավաքների անցկացումը նաեւ արտակարգ դրության ավարտից հետո

Արտակարգ դրության ռեժիմը որևէ այլ խնդիր, բացի քաղաքականից, այլևս չի լուծում, այն զուտ նրա համար է, որ ինչքան հնարավոր է երկար սահմանափակվի խաղաղ հավաքների իրավունքը։ Այս մասին Tert.am-ի հետ զրույցում ասաց Մարդու իրավունքների առաջին պաշտպան Լարիսա Ալավերդյանը:

Նա նշեց, որ պահանջված միջոցառումներից օրինակ շենքերի մուտքերի, այլ վայրերի ախտահանումը, վարակի կանխարգելման այլ միջոցները չեն կատարվում: Ըստ նրա՝ եթե նպատակը վարակի կանխումն է, պետք է այդ քայլերն արվեն, սակայն արտակարգ դրությունը զուտ քաղաքացիների խաղաղ հավաքների անցկացման իրավունքը երկար սահմանափակելու համար է: «Դա անընդունելի է, պետք է հավաքները թույլատրվեն ու պետք է հսկվի, որ սոցիալական հեռավորություն պահվի, բայց դա չի արվում: Այստեղ մնում է միայն մեկ ենթադրություն․ սա արվում է քաղաքական արգելքներ, քաղաքական ճնշումներ գործադրելու համար, ինչի համար շատ ափսոսում եմ»,- ընդգծեց նա:

Դիտարկմանը՝ վարչապետը հայտարարել է, որ այլևս արտակարգ դրությունը չի երկարացվի և հարցին՝ հնարավոր համարո՞ւմ է արտակարգ ռեժիմի ավարտից հետո ևս հավաքները արգելված լինեն, նա պատասխանեց. «Ամբողջ այդ շրջապտույտը և տարբեր ձևերով հայտարարությունները պատրաստում են հանրությանը այդպիսի որոշման: Ավելի քիչ կլինեն սահմանափակումները տնտեսական, սոցիալական բնագավառներում, բայց կարծում եմ, խաղաղ հավաքների արգելքը կմնա: Դա անընդունելի է»։

Այդուհանդերձ Ալավերդյանը նշեց, որ եթե առանձին քաղաքացիներ նախաձեռնեն այդպիսի ակցիներ, հավաքներ ու եթե դա արգելվի, պետք է սկսվի իրավական գործընթաց․ «Այդ կերպ մենք պարզապես կդիմադրենք օրվա իշխանությունների կողմից ժողովորդավարության դեմ ակտիվ պայքարին»։

Դիտարկմանը՝ Հանրային խորհուրդը քննարկում է արել, որ թույլատրվի 30 հոգանոց խմբերով հավաքները և հարցին՝ ի՞նչ կարծիք ունի սրա վերաբերյալ, Ալավերդյանը նշեց, որ չի կարծում, թե Հանրային խորհուրդը պետք է թվերի մասին խոսի: «Հենց այստեղ է «շան գլուխը թաղված»: Պետք է հասկանանք՝ ինչի համար է այդ սահմանափակումը, եթե նրա համար է, որ կանխվի COVID-19-ի տարածումը, դրա համար նորմեր պետք է սահմանվեն: Պանդեմիայի ամենաթեժ օրերին և՛ Գերմանիայում, և՛ Իսրայելում տեղի են ունեցել մեծաթիվ հավաքներ, ուղղակի մարդիկ պահպանել են սոցիալական հեռավորություն: Հստակեցնենք՝ այստեղ թիվը չէ, որ պետք է անհնագտսացնի Հանրային խորհրդին, այլ՝ ձևը: Սահմանափակումները պետք է վերաբերեն նրան, թե ինչպես է հավաքը իրականացվում, այլ ոչ թե քանի հոգով է իրականացվում»,- շեշտեց Ալավեդյանը։

Խաղաղ հավաքների անցկացման արգելքը վերացնելու համար, ըստ Լարիսա Ալավերդյանի, պետք է տեղի ունենան հանրային քննարկումներ: «Բայց ես շատ քիչ հույսեր եմ կապում հանրային քննարկումների հետ, չեմ կարծում՝ օրվա իշխանությունը զգայուն է իրական հասարակական հանրային պահանջի հանդեպ:

Օրվա իշխանությունն ունի իր ճանապարհային քարտեզը, որով անցնում է ժողովրդավարության ամենագռեհիկ իմիտացիային: Դա շատ ցավալի է, մենք դրա դեմ պայքարել ենք նախկինում: Հույս կար, որ առնվազն շատ կարևոր հիմնարար իրավունքների հանդեպ նոր իշախանությունները չեն կրկնի հների սխալները, բայց տեսնում ենք հակառակ գործընթացը, նոր իշխանությունները անցնում են կարմիր գծերը»,- ասաց նա և հավելեց, որ իր համար խնդիրն այն է, որ սա վնաս է հասցնում Հայաստանի՝ որպես իրավական պետության կայացմանը և ամբողջովին խեղաթյուրում հանրության գիտակցությունը:

Ըստ նրա՝ իշխանությունները կոչված են երկրում ապահովել հանրային համերաշխությունը: «Որևէ մեկը տեսնո՞ւ մ է այդ ուղղությամբ որևէ նախաձեռնություն. ես տեսնում եմ ամբողջովին հակառակ ուղղությամբ: Այսինքն՝ այս առումով իշխանությունն իր կարևորագույն խնդիրը չի կատարում, նա այսօրվա իր կեցվածքով պարզապես հակադրում է մարդկանց իրար դեմ և դրանով մեծ սպառնալիք ստեղծում ազգային անվտանգության առումով: Ես միշտ ասել եմ՝ չեմ պայքարելու իշխանությունների դեմ, բայց հասարակությունը տեսնում է, որ այս իշխանությունը, այս խումբը ի զորու չէ կատարել իր կարևորագույն գործառույթը: Իշխանությունը պետք է ոչ թե մեզ կանչի ու փողոցում լուծի խնդիրները, այլ ինչ-որ քաղաքակիրթ հարթակներում՝ ԱԺ, Հանրային խորհուրդ, ՍԴ-ում պետք է լուծի: Այդ բոլորն ինչի՞ համար են, որ լուռ կատարեն մեկ անձի քմահաճույքնե՞րը: Ես չեմ գտնում, որ պետությունը նրա համար է ստեղծված, որ մեկ անձը իրականացնի իր մանկության քմահաճունքներն ու երազանքները»,- ասաց նա:

Լարիսա Ալավերդյանը համոզմունք հայտնեց, որ եթե ինչ-որ մարմին էլ ստեղծվի խաղաղ հավաքների արգելքը վերացնելու համար, քննարկումներ լինեն, իշխանությունը ականջալուր չի լինի: «Ես համոզված եմ, որ չի լինի, հնարավոր է՝ նույն Հանրային խորհուրդը ինչ-որ կրավորական որոշում կայացնի, որ ստեղծվի այնպիսի տպավորություն, որ Հանրային խորհրդի ձայնը լսելի է դարձել վարչապետի համար: Դա չի բացառվում, բայց մենք գնալով ավելի ու ավելի ենք հեռանում իրական ժողովրդավարությունից, իրական իրավական պետություն կայացնելուց»,- եզրափակեց նա: