Մոսկվայի պայմաններից մեկը Դոնբասի միջազգային ճանաչումն է որպես Ռուսաստանի տարածք

Ուկրաինայում պատերազմը դադարեցնելու բանակցություններում Մոսկվայի պայմաններից մեկը Դոնբասի միջազգային ճանաչումն է որպես Ռուսաստանի տարածք, TASS-ին Աբու Դաբիում հայտնել է արևմտյան աղբյուրը։ Աղբյուրի խոսքով՝ Կրեմլը այս կետը դիտարկում է որպես «մեծ համաձայնագրի» մաս։ «Ռուսական կողմի համար Դոնբասի բոլոր երկրների կողմից ճանաչման այս ասպեկտը համարվում է շատ կարևոր», - ընդգծել է աղբյուրը։ Ռուսաստանի, Ուկրաինայի և Միացյալ Նահանգների միջև եռակողմ բանակցությունների երկրորդ փուլը տեղի է ունենում Աբու Դաբիում փետրվարի 4-5-ը։

ԱՄՆ-ն առաջարկել էր փոխզիջում կատարել՝ Դոնբասում չեզոք ուժերի տեղակայման տեսքով՝ ուկրաինական և ռուսական զորքերի հեռացմամբ, սակայն Մոսկվան մերժել է նմանատիպ ցանկացած սցենար, գրում է The New York Times-ը։ Մեկ այլ տարբերակ է «ապառազմականացված գոտու» ստեղծումը, սակայն Կրեմլում ընդգծել են, որ այդ դեպքում Դոնբասը միևնույն է գտնվելու է Ռուսաստանի կառավարման ներքո, իսկ բանակի փոխարեն այնտեղ կտեղակայվի Ռոսգվարդիան։

Խոսելով պատերազմի դադարեցման համար հնարավոր փոխզիջումների մասին՝ Զելենսկին հայտարարում էր, որ նույնիսկ հակամարտության սառեցումը ներկայիս շփման գծով արդեն իսկ լուրջ զիջում է Կիևի կողմից, իսկ եթե Ուկրաինան հանձնի Դոնբասը, ապա Ռուսաստանը ամրացված պլացդարմ կստանա նոր հարձակման համար։ Նա նշում է, որ կարգավորման ցանկացած տարբերակ ենթադրում է փոխադարձ քայլեր։ Միևնույն ժամանակ, Զելենսկին բացառում էր Ուկրաինայի որևէ օկուպացված տարածքի ճանաչումը որպես ռուսական։ «Մենք դրան չենք գնա։ Քանի որ դրանք ժամանակավորապես օկուպացված են և դա նշանակում է, որ դրանք երբեք ռուսական չեն դառնա», - ընդգծում էր նա։

Վաշինգտոնի խաղաղության ծրագրի առաջին օրինակը, որը բաղկացած է եղել 28 կետից, ենթադրում էր, որ ԱՄՆ-ն և այլ երկրներ ռուսական կճանաչեն Ղրիմն ու Դոնբասը (ներառյալ Դոնեցկի և Լուգանսկի մարզերը)։ Ուկրաինայից դա չէր պահանջվում։ Սակայն Կիևի հետ խորհրդակցություններից հետո ծրագիրը փոփոխություններ է կրել և կրճատվել մինչև 20 կետի, որոնք այժմ քննարկվում են։

ԱՄՆ պետքարտուղար Մարկո Ռուբիոն, ամփոփելով հունվարի 23–24-ին կայացած բանակցությունների առաջին փուլը, հայտարարել է, որ տարածքները մնում են առանցքային չլուծված հարցը, որը կարգավորելը «շատ դժվար» է։ Այս ֆոնին Սպիտակ տունը Ուկրաինային հասկացրել է, որ ԱՄՆ-ն նրան անվտանգության երաշխիքներ չի տրամադրի, եթե նա չհամաձայնի Դոնբասը Ռուսաստանին հանձնելուն, հայտնել են Financial Times-ի աղբյուրները։