Աբու Դաբիում ավարտվել են Ուկրաինայի, Ռուսաստանի և ԱՄՆ-ի միջև բանակցությունները

Արաբական Միացյալ Էմիրությունների մայրաքաղաք Աբու Դաբիում ավարտվել են Ուկրաինայի, Ռուսաստանի և ԱՄՆ-ի միջև երկօրյա բանակցությունները, հինգշաբթի՝ փետրվարի 5-ին, հայտարարել է Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովի մամուլի քարտուղար Դիանա Դավիթյանը։

Երեք երկրների պատվիրակությունները հանդիպել են փակ ձևաչափով։ Ամերիկյան կողմը ԱՄԷ-ում ներկայացրել են ԱՄՆ նախագահի հատուկ դեսպանորդ Սթիվեն Ուիթքոֆը, Դոնալդ Թրամփի փեսան՝ Ջարեդ Քուշները և ԱՄՆ բանակի նախարար Դանիել Դրիսկոլը։ Ուկրաինական պատվիրակությունը ղեկավարել է ԱԱԽ քարտուղար Ռուստեմ Ումերովը։ Ռուսական պատվիրակությունը գլխավորել է Ռուսաստանի զինված ուժերի գլխավոր շտաբի գլխավոր վարչության պետ, ծովակալ Իգոր Կոստյուկովը։

Ուկրաինայի նախագահի գրասենյակի ղեկավար Կիրիլ Բուդանովը նշել է, որ խորհրդակցությունները «իսկապես կառուցողական են եղել», սակայն մանրամասներ չի ներկայացրել: Ուկրաինայի նախագահ Վլադիմիր Զելենսկին դրանք անվանել է «դժվար»: «Ուկրաինան եղել է և կմնա չափազանց կառուցողական»,- ասել է պետության ղեկավարը Լեհաստանի վարչապետ Դոնալդ Տուսկի հետ Կիևում կայացած համատեղ ասուլիսում։ -Մենք ցանկանում ենք ավելի արագ արդյունքներ»,- հավելել է Զելենսկին:

Ըստ ռուսական ՏԱՍՍ լրատվական գործակալության՝ ԱՄԷ մայրաքաղաքում բանակցությունների ընթացքում քննարկվել են տնտեսական հարցեր, տարածքների կարգավիճակը և հրադադարի մեխանիզմները: Գործակալության տվյալներով՝ ռուս մասնակիցները հայտարարել են Ուկրաինայի հետ խաղաղության համաձայնագրի շուրջ առաջընթացի մասին:

Մի քանի ժամ առաջ Ուիթքոֆը հայտարարել էր, որ կողմերը համաձայնել են փոխանակել 157-ական գերիների: Սա առաջին նման փոխանակումն է հինգ ամսվա ընթացքում, ընդգծել է ԱՄՆ հատուկ ներկայացուցիչը: «Քննարկումները կշարունակվեն, և առաջիկա շաբաթներին սպասվում է առաջընթաց»,- հավելել է նա: Զելենսկին փոխանակման մասին հայտարարել է երեկ երեկոյան՝ առանց նշելու գերիների թիվը:

Ռուսաստանի պաշտպանության նախարարությունը հայտարարել է, որ արդեն տեղի է ունեցել 157-ը 157-ի դիմաց գերիների փոխանակումը: Փոխանակման շրջանակներում Կուրսկի մարզից վերադարձվել են նաև երեք քաղաքացիական անձինք, հաղորդում է ՏԱՍՍ-ը: Գործակալության տվյալներով՝ գերությունից վերադարձած ռուս զինծառայողները գտնվում են Բելառուսում։

Ուկրաինական պատվիրակության ղեկավար Ումերովը խորհրդակցությունների առաջին մասը անվանել է «արդյունավետ և իմաստալից»: Իր հերթին, ԱՄՆ պետքարտուղար Մարկո Ռուբիոն նշել է, որ չլուծված հարցերի ցանկը «զգալիորեն կրճատվել է», և մասնակիցները «իրական առաջընթացի են հասել»: Այնուամենայնիվ, նա նշել է, որ «ամենադժվար հարցերը մնում են», և Ուկրաինայում պատերազմը շարունակվում է: