Ռոնալդուն մտադիր է դադարեցնել ակումբում հայտարարած իր գործադուլը և վերադառնալ խաղադաշտ

«Ալ-Նասրի» առաջատար Կրիշտիանու Ռոնալդուն մտադիր է դադարեցնել ակումբում հայտարարած իր գործադուլը և վերադառնալ խաղադաշտ։ Sky Sports-ի փոխանցմամբ՝ «Ոսկե գնդակի» հնգակի դափնեկիրը պատրաստվում է մասնակցել Սաուդյան Պրո լիգայի շրջանակում կայանալիք «Ալ-Իթիհադի» դեմ առանցքային հանդիպմանը։

Հիշեցնենք, որ Ռոնալդուն բաց էր թողել «Ալ-Ռիյադի» դեմ դերբին՝ դժգոհություն հայտնելով տրանսֆերային քաղաքականությունից և ֆինանսական միջոցների բաշխումից։ Ըստ աղբյուրի՝ պորտուգալացու զայրույթի պատճառը Կարիմ Բենզեմայի տեղափոխությունն էր «Ալ-Իթիհադից» «Ալ-Հիլալ», ինչին ինքը՝ Ռոնալդուն, կտրականապես դեմ էր արտահայտվել։

Ռոնալդուի բացակայության պայմաններում թիմի գլխավոր մարզիչ Ժորժե Ժեզուսը ստիպված էր վերաձևավորել կազմը, և «Ալ-Նասրը» նվազագույն՝ 1։0 հաշվով հաղթանակ տարավ Սադիո Մանեի գոլի շնորհիվ։

Sky Sports News-ը նշում է, որ Ռոնալդուն իրեն դժգոհ է զգում ակումբի կառավարումից՝ կարծելով, որ «Ալ-Նասրը» զրկված է այն նույն ֆինանսական աջակցությունից, որը PIF հիմնադրամը տրամադրում է մյուս երեք գրանդներին («Ալ-Հիլալ», «Ալ-Ահլի» և «Ալ-Իթիհադ»): Սակայն պարբերականը հստակեցնում է, որ Բենզեմայի տրանսֆերը ֆինանսավորվել է մասնավոր ներդրողի կողմից, ինչը կարող է անել նաև «Ալ-Նասրը»:

Լիգայի ղեկավարությունը հերքում է անարդար մրցակցության մեղադրանքները՝ շեշտելով, որ «Ալ-Նասրն» այս մրցաշրջանում արդեն ծախսել է շուրջ 100 մլն ֆունտ ստեռլինգ՝ համալրվելով այնպիսի աստղերով, ինչպիսիք են Ժոաո Ֆելիքսն ու Քինգսլի Կոմանը։