«Հեղափոխական» կառավարությունն ընդդեմ հպարտ քաղաքացիների

Հայաստանում կառավարությունը շարունակում է անել ամեն ինչ, որ «դուխով» եւ «հպարտ» քաղաքացիներն ավելի ու ավելի վատ վիճակի մեջ հայտնվեն: Հիմա հերթը հասել է Մերգելյանի գյուղատնտեսական շուկային, որը գործում էր արդեն ինը տարի:

Ինը տարի շարունակ կիրակի օրերին այստեղ իրենց ապրանքն էին վաճառում հենց գյուղացիները, ինչից շահում էին եւ նրանք եւ հենց քաղաքաբնակները, գնելով որակյալ եւ համեմատաբար էժան գյուղմթերք:

Հիմա «հեղափոխական» իշխանությունը խնդիր է դրել վերջ տալ շուկայի գոյությանը, քանի որ այն խանգարում է օլիգարխներին կամ խոշոր սեփականատերերին, որոնց նյարդայնացնում է այդ գյուղատնտեսական շուկայի գոյությունը:

Ոստիկանությունը եւ քաղաքապետարանն այսօր՝ հուլիսի 19-ին գյուղացիներին բռնի ուժի կիրառմամբ արգելեցին առեւտուր իրականացնել: Ոչ, նրանք այս անգամ որպես պատճառ չմատնանշեցին կորոնավիրուսային համավարակը, պարզապես եղան ցինիկ եւ անկեղծորեն ասացին, որ նրանց գործունեությունը խանգարում է հարակից խանութներին, այդ թվում եւ սիրելի գործարարին պատկանող «Երեւան Սիթիին»:

Լրագրողների հետ զրույցում «հեղափոխական» պաշտոնյան անկեղծացավ եւ նշեց, որ մոտակա խանութների աշխատակիցները բողոքում են, որ շուկայի պատճառով շաբաթական 3 օր բացարձակապես առեւտուր չի լինում:

Ահա եւ վերջ, ինչ հպարտ, ինչ դուխով քաղաքացի, կարեւորը սիրելի գործարարներն են եւ նրանց քմահաճույքները բավարարելը:

«9 տարի է՝ մենք այստեղ աշխատում ենք, միակ տեղն ա, որտեղ գյուղացին կարողանում ա իր ապրանքն իրացնել, անիմաստ շուկա՞ ա ձեզ համար: Մեզ թվում ա, որ մի լուրջ մարդու մենք խանգարում ենք, վերեւից էլ հրաման կա, որ փակեք այն»,- քաղաքապետարանի ներկայացուցչին դիմեց գյուղացիներից մեկը, շատ դպուկ նկատելով, թե որն է իրենց դեմ պայքարի պատճառը:

Գյուղացիներին խորհուրդ տվեցին իրենց առեւտուրն անել Կոմիտասի շուկայում, ինչը, իհարկե, մի շարք հասկանալի պատճառներով անընդունելի է գյուղացիների համար:

Ահա եւ ձեր «հեղափոխական» իշխանությունը: Ստացվում է, որ ինը տարի առաջ, «հանցագործ», «թալանչի» իշխանությունները գյուղացիներին տեղ հատկացրեցին իրենց ապրանքն իրացնելու համար, իսկ «ժողովրդի սիրելի իշխանությունը» որոշեց ուղղել նախկիների «սխալը» եւ փակել շուկան, քանի որ այդպես է ուզում նրանց սրտի գործարարը:

Վարդան Մխիթարյան

Top-News.am