Այս պահի դրությամբ ունենք 976 փակված հանրային սննդի օբյեկտներ, սննդի արտադրամասեր, խանութներ

ՍԱՏՄ-ն հենց առաջի օրվանից լծված էր այն աշխատանքներին, որոնք միտված են մեր սպառողներին զերծ պահել կորոնավիրուսային ինֆեկցիայից: Այս մասին պարետատան նիստից հետո ասուլիսին հայտարարեց ՍԱՏՄ ղեկավար Գեորգի Ավետիսյանը:

«Մարտի 19-ից սկսած ժամանակահատվածում` իրականացրել ենք 13 067 շրջայցեր, ստուգումներ և դիտարկումներ, կազմել ենք 1 015 արձանագրություն: Այս պահի դրությամբ ունենք հանրային սննդի 976 փակված օբյեկտներ, սննդի արտադրամասեր և խանութներ: Ուրախացնողն այն է, որ վերջին մեկ ամսվա ընթացքում իրականցրել ենք 4000 շրջայց, որից միայն 1000-ի դեպքում ենք արձանագրություններ կազմել»,- ասաց նա:

Անդրադառնալով խախտումներին՝ Ավետիսյանը նշեց. «Հիմնականում չեն պահպանում հաճախորդների միջև առնվազն 1.5 մետր հեռավորությունը, հաճախորդներին մատուցում են նարգիլե, որը խստիվ արգելվում է, աշխատակիցները դիմակը կրում են սխալ՝ չծածկելով քիթը և բերանը: Սեղաններից բացակայում են ձեռքերի ախտահանման համար նախատեսված ախտահանիչները: Չի իրականացվում հաճախորդների և աշխատողների ջերմաչափում, չեն վարում ջերմաչափման տվյալների գրանցման մատյաններ: Դիմակների համար չունեն առանձնահատուկ աղբամաններ, տեսանելի վայրում փակցված չեն իրազեկման պաստառները»,- ասաց նա: