Իսպանիան Եվրոպային կոչ է անում միասնական պատասխան տալ ավիափոխադրումների ոլորտի ճգնաժամին

Իսպանիան Եվրոպային կոչ է անում միասնական պատասխան տալ ավիափոխադրումների ոլորտի ճգնաժամին, որն առաջացել է կորոնավիրուսի համավարակի զսպման համար ուղեւորությունների սահմանափակումների հետեւանքով, հայտարարել է էկոնոմիկայի նախարար Նադիա Կալվինոն, հայտնում է Reuters-ը։

Նրա խոսքերով՝ Եվրոպական միության անդամ-պետությունները պետք է ավիաընկերությունների համար հավասար պայմաններ ապահովեն, եւ առավել հարուստ երկրները ավելի շատ օգնություն չպետք է ցուցաբերեն իրենց ավիաընկերություններին՝ ի վնաս այլ երկրների ավիաընկերությունների։

Խոշոր եվրոպական ավիաընկերությունները, այդ թվում գերմանական Lufthansa-ն, պետական օգնության համաձայնագրի կնքման բանակցություններ են վարում։ «Ես կարծում եմ, որ Եվրոպական հանձնաժողովը շատ ուշադիր հետեւում է, որպեսզի մրցակցության կանոնների խախտումներ թույլ չտրվեն»,- ասել է Կալվինոն։

Հայտարարված օգնության ծավալը լայնորեն տատանվում է Եվրոպայի երկրներում։ Այն դեպքում, երբ Air France-KLM-ը Ֆրանսիայի կողմից, որպես օգնություն, ստացել է 7 մլրդ եվրո, եւ եւս 2-4 մլրդ եվրոյի հոլանդական պարտավորություններ, International Consolidated Airlines-ը, որը պատկանում է British Airways-ին, եւ իսպանական Iberia-ն ստացել են ընդամենը 1 մլրդ եվրո։

Կալվինոն նաեւ հաստատել է Իսպանիայի այն դիրքորոշումը, որը աջակցում է ԵՄ-ի վերականգնման ընդհանուր հիմնադրամի ստեղծմանը, որն էլ պետք է համատեղ ֆինանսավորվի անդամ-պետությունների կողմից։