Վրաստանը կրկին հաղթեց Հայաստանին

Վրացիներն ամեն ինչ անում են օր առաջ սահմանները զբոսաշրջիկների համար բացելու համար: Վստահ եղեք, որ եթե նրանք այս հարցում չլինեն առաջինն աշխարհում, ապա լինելու են առաջիններից մեկը:

Վրաստանը դառնալու է այն երկիրը, որը առաջիններից մեկն է լինելու, իսկ գուցե հենց առաջինը, որը զբոսաշրջիկների համար բացելու է սահմանը: Ավելին, զբոսաշրջիկները մեկնելու են Վրաստան հանգստանալու, մեր հարեւան երկիրն էլ զբոսաշրջիկների բերած գումարների շնորհիվ արագ շտկելու է մեջքը:

Զբոսաշրջիկները, նույնիսկ ամենաբխածնդիրները նայելու են վիճակագրությանը եւ համոզվելու, որ կորոնավիրուսը Վրաստանով գրեթե չի անցել եւ ուրախությամբ ուղեւորվելու են Վրաստան:

Իսկ ի՞նչ է անում Հայաստանը: Մեր երկիրը ինչ-որ անհասկանալի մրցավազքի մեջ է մտել եւ անգամ 27-ամյա ծանր հիվանդ աղջկա մահը վերագրում կորոնավիրուսին: Նույնիսկ սահմանները բացվելուց հետո դեռ երկար ժամանակ զբոսաշրջիկները զգուշանալու են Հայաստան գալուց մի շատ պարզ պատճառով. կորոնավիրուսից այստեղ շատ են մահացել եւ շատ հիվանդացել:

Շարունակեք ծանր հիվանդների մահը վերագրել կորոնավիրուսին, շարունակեք առողջարանային քաղաքները դարձնել մեկուսացման վայրեր եւ փայլուն հաջողություններ կարձանագրեք, թե տնտեսության զարգացման, թե զբոսաշրջիկային ոլորտում: 

Շարունակեք որոշումներ կայացնել առանց մասնագետների հետ խորհրդակցելու, առանց քննարկումների, առանց ապագային նայելու եւ կստանաք փլուզված տնտեսություն, բարոյալքված հասարակություն եւ աղքատ բնակչություն: 

Հակոբ Ասատրյան

Top-News.am