Օգնելու փոխարեն պետությունը բիզնեսին խորհուրդ է տալիս յոլա գնալու համար ճիշտ որոշում կայացնել

Եթե հասկանում ենք, որ վարձակալությունը թանկ է, պետք է գնահատենք՝ արդյոք հնարավո՞ր է պահպանելով բիզնես ուղղությունը՝ փոխել տեղակայումը կամ ժամանակավորապես դադարեցումն այդ հատվածում։ Այս մասին այսօր՝ ապրիլի 27-ին, ասուլիսի ժամանակ ասաց Էկոնոմիկայի փոխնախարար Նաիրա Մարգարյանը՝ անդրադառնալով այն խնդրին, որ տնտեսվարողները ստիպված են եղել վճարել եւ հարկը եւ տեղի գումարը եւ հարցին՝ ինչ աջակցություն է նախատեսում Էկոնոմիկայի նախարարությունը։

«3-րդ միջոցառման սահմանում վարձակալական վճարները ներառված են նպատակային ծախսային ուղղություններում, հետեւաբար ստանալով այս վարկերը, հնարավոր է մարել այդ վճարները։ 3-րդ միջոցառման սահմաններում վարկի մեծությունը պայմանավորված է շահառուի 2019 թվականի շրջանառության հետ եւ յուրաքանչյուր շահառու կարող է օգտվել իր 2019 թվականի շրջանառության 10 տոկոսի չափով վարկային գումարից։ Յուրաքանչյուր կազմակերպություն պետք է գնահատի՝ նախ ինքը կարողանալու է հետագայում մարել այդ վարկային գումարները, այ կազմակերպությունները, որոնք գիտակցում են, որ արդեն իսկ ծանրաբեռնված են եւ հավանականությունը փոքր է, որ կարող են մարել, ապա իրենք պետք է այլ լուծումներ գտնել»,- ասաց փոխնախարարը։

Նաիրա Մարգարյանը նշեց, որ այդ կազմակերպությունները պետք է պլանավորեն, թե ինչպես են պատրաստվում այդ գումարը ծախսել. «Տնտեսվարողները պետք է կարողանան ճիշտ որոշում կայացնել իրենց գոյությունը պահպանելու համար. նվազեցնել առաջին հերթին այն ծախսերը, որոնցով խիստ պայմանավորված չէ իրենց գոյությունը»։