Կհասկանայի Մայիլյանին, եթե նա ընտրությունները բոյկոտեր նաեւ առաջին փուլում. Արփինե Հովհաննիսյանն Արցախում է

ԱԺ նախկին փոխնախագահ Արփինե Հովհաննիսյանը, որը որպես դիտորդ մասնակցում է Արցախի նախագահական ընտրությունների երկրորդ փուլին, ընտրությունների ընթացքը խաղաղ է գնահատում։

«Իհարկե, առաջին փուլի համեմատ ավելի պասիվ են ընտրողները, բայց դա ունի օբյեկտիվ պատճառներ, քանզի նախորդ անգամ մասնակցում էին թե խորհրդարանական, թե նախագահական ընտրությունների, ու բազմաթիվ ուժեր էին մասնակցում ընտրապայքարին։ Տրամաբանական է, որ ավելի մեծ էր հետաքրքրությունը եւ շատ մարդիկ էին ընտրողների հետ հանդիպումներում նրանց շահագրգռել գնալ իրենց քաղաքացիական պարտքը կատարելու»,- նշեց նա։

Արփինե Հովհաննիսյանի խոսքով՝ պահանվում են անվտագության միջոցառումները։ Ընտրախախտումների մի քանի փոքրիկ դեպք է միայն արձանագրվել, մասնավորապես, գյուղերից մեկում բացված ընտրատեղամասում քվեատուփն այնպես է կահավորված եղել, որ հնարավոր է եղել պատուհանից դիտարկել ընտրությունը։ Խախտումը շտկվել է ընտրողների դիտարկումներից հետո։

Նշենք, որ 14.00-ի դրությամբ Արցախի նախագահի 2-րդ փուլի ընտրություններին մասնակցել է ընտրողների 28,4%-ը։ Պայքարում են երկրորդ փուլ անցած երկու թեկնածուները՝ Արայիկ Հարությույանը եւ Մասիս Մայիլյանը։ Վերջինս, սակայն, հայտարարել է այս փուլը բոյկոտելու մասին եւ չի մասնակցի քվեարկությանը։

Ըստ Արփինե Հովհաննիսյանի՝ անտրամաբանական է այս փուլին չմասնակցելը։

«Ես կհասկանայի Մասիս Մայիլյանին, եթե նա կոչ աներ իր ընտրողներին ընտրությունները բոյկոտել նաեւ առաջին փուլում, քանի որ առաջին փուլի համեմատ որեւէ հանգամանք չի փոխվել՝ բացառությամբ նրա, որ որոշակի քաղաքական ուժի աջակցությունը իրեն չկա»,- նշեց նա։