Աղքատ բնակչությանը փորձում են զրկել նաեւ վարկ վերցնելու հնարավորությունից

Ընդհանուր փիլիսոփայություն այն է, որ մենք ուզում ենք մարդկանց վարկավորել իրենց եկամուտները հաշվի առնելով: Այս մասին ԱԺ տնտեսական հարցերի հանձնաժողովում «Սպառողական կրեդիտավորման մասին» օրենքում լրացումներ կատարելու մասին օրենքի նախագծի քննարկման ժամանակ նշեց օրենքի համահեղինակներից Վարազդատ Կարապետյանը:

Նա նշեց, որ առաջարկվում է, որ կարճ վարկերի դեպքում Կենտրոնական բանկն իր նորմատիվ իրավական ակտերով մինչեւ երեք ամիս ժամկետով կնքվող մինչեւ 200,000 ՀՀ դրամի չափով սպառողական վարկերի համար սահմանում է պարտադիր պահանջներ եւ պայմաններ, վարկավորման կանոններ, հիմք ընդունելով սպառողի վարկունակության, սպառողի պարտքի եւ եկամուտի հարաբերակցության, վարկը սպասարկելու սպառողի ունակության գնահատման չափանիշները:

Նա հավելեց, որ իրենք կողմ են, որ սա տարածվի նաեւ երկար վարկերի վրա, սակայն այս պահին դեռեւս օրինագիծն այս տեսքն ունի:

«Մենք այս նախագիծը մոտ 3 ամիս տարբեր ձեւաչափերով քննարկել ենք, ակնհայտ է, որ դեռ պետք է քննարկենք: Կանցնի մի քանի ամիս եւ մեր ֆինանսական կազմակերպություններն ու բանկերը հսկայական պրոբլեմներ են ունենալու սպառողական վարկերի հետ կապված: Այս կարգավորմամբ մենք ոչ միայն մարդիկ ավելի պատասխանատու մոտենան, այլեւ բանկերը, որովհետեւ մենք հիմա չենք պատկերացնում, թե չվճարումների ինչ խնդիրների կբախվեն բանկերը: Սա շատ էական հարց է, մենք ԿԲ-ում անցյալ անգամ եւս մի քանի մեթոդներ քննարկեցինք, որոնք հնարավոր կդարձնեն այս խնդիրների լուծումը»,-ընդգծեց Կարապետյանը:

Լուրեր Հայաստանից - NEWS.am