Հավերժական նեգատիվիզմ. Երևի այս ամենը օրինաչափ է «հեղափոխական ժամանակների» համար

Առաջներում (ուսանող ժամանակ) շատ էի զարմանում, երբ կարդում էի, թե ինչպես են ֆրանսիական մեծ հեղափոխության ժամանակ մահապատժի ենթարկել դարի խոշորագույն քիմիկոս-բնագետ Լավուազեին, մեղադրելով հակահեղափոխության մեջ: ՈՒղղակի հավատս չէր գալիս. հեղափոխություն, էն էլ - մեծ:

Սովորեցնում էին, թե սոցիալական հեղափոխությունները խթանում են մարդկության առաջընթացը, իսկ ես մտածում էի - եթե ոչնչացնում են ստեղծագործական միտքը և դրա կրողներին, ինչ պրոգրեսի մասին են խոսում:

Մեկ այլ առաջամարտիկ - Վլադիմիր ՈՒլյանով(Լենին) անունով, հայտարարում էր, որ մտավորականներն ու գիտնականները հակահեղափոխական «կղանք» են, որոնց պիտի պարզապես գնդակահարել: Շատ շուտով ամեն տեսակ Բունիններին և Նաբոկովներին, Պիտիրիմ Սորոկիններին և Ռախմանինովներին լցրին շոգենավերն ու արտաքսեցին Ռուսաստանից: Հանուն մարդկության առաջընթացի:

Այս փաստն էլ չէր ուղեղիս պառկում: Բայց հիմա, բոլորովին թարմ իրադարձությունների տպավորությամբ, ասես, ամենը դառնում է հասկանալի: Երբ համացանցում որևէ պրոֆեսոր կամ իր բնագավառի լուրջ մասնագետ մտահոգություն կամ կարծիք է հայտնում ընթացիկ խնդիրների մասին, որոնք տարբերվում են հեղափոխական տափակ դոգմաներից, ապա միայն տեսեք լուտանքների և հայհոյանքների կրակահերթերը նրանց դեմ, որ արձակվում են շարիկովների «սան-էպիդ» բրիգադների կողմից: Երևի այս ամենը օրինաչափ է «հեղափոխական ժամանակների» համար:

Աստված խելք տա բոլորին:

Վարդգես Դավթյանի ֆեյսբուքյան էջից