Արսինե Խանջյանին քննադատող նյութերի կողքին տեղ են գտնում Քարդաշյանների մասին հիացմունքով լի նորություններ

Իսկ դուք գիտե՞ք, որ 2013 թվականին
- ՀՀ անկախության 20-ամյակի առթիվ «Ոսկե ծիրան» կինոփառատոնի հիմնադիր, կինոռեժիսոր Ատոմ Էգոյանին շնորհվեց Պատվո շքանշան:
- ՀՀ անկախության 20-ամյակի առթիվ դերասանուհի Արսինե Խանջյանը պարգևատրվեց Հայրենիքի հանրության ծառայությունների համար Առաջին կարգի մեդալով:
Դա, բնականաբար, այն ժամանակ էր, երբ Արսինե Խանջյանն ու նրա ամուսինը քաղաքացիական և քաղաքական կոչերով դեռ ակտիվորեն հանդես չէին գալիս, երբ դեռ այդքան բարձրաձայն չէին անդրադառնում Հայաստանում տիրող անարդարությանը, ապօրինություններին և ազատ խոսքի ու մտքի հանդեպ բռնություններին։ Դա այն ժամանակ էր, երբ իշխանական աթոռին հայտնված մարդուն անհարմարություններ չէին պատճառում՝ մատնացույց անելով այն բոլոր բռնությունները, որոնք նա կիրառում է սեփական ժողովրդի հանդեպ։

Իսկ այսօր՝ 2017 թվականին, երբ նույն Արսինե Խանջյանն իր քաղաքացիական և քաղաքական դիրքորոշումն արտահայտեց՝ չհամաձայնվելով ՀՀ գործող իշխանությունների քայլերին, Բաղրամյան-26-ի պատվերով աշխատող տարատեսակ կայքերից հանկարծակի տեղեկանում ենք, որ, փաստորեն, նա նկարահանվել է բաց տեսարաններում, և դա, բնականաբար, ըստ այդ կայքերի հեղինակների «մտքի գոհարների»՝ նրան թույլ չի տալիս մտահոգվել հայրենիքի և սեփական ժողովրդի ապագայով, Հայաստանում տիրող ամենաթողությունով և տոտալիտար համակարգերին բնորոշ ամենակեղտոտ երևույթներով։
Բայց, ինչպիսի՛ զարմանք․․․․նույն Արսինե Խանջյանին քննադատող նյութերի հարևանությամբ հեշտ ու հանգիստ «բնակվում են» իր ազատ բարքերով հայտնի Քիմ Քարդաշյանի և նրա ընտանիքի մասին ամենաթարմ նորությունները, որոնք իրենց մեջ մի կաթիլ անհամ դատապարտություն չեն պարունակում։ Ավելին՝ մարդիկ հիանում և հպարտանում են նրա նոր կիսաթափանցիկ բլուզներով, տաբատներով (կամ, ավելի ճիշտ, դրանց բացակայությամբ) և այլն։

Ասածս ինչ է․․․եթե պատվեր եք կատարում, սիրելինե՛րս, ապա գոնե նեղություն քաշեք ու փորձեք սկզբունքայնության տպավորություն ստեղծել։ Թե չէ շատ անհարմար իրավիճակ է ստացվում։ Ձեր շեֆին էլ փոխանցեք, որ գոնե այնպես ձևակերպի պատվերը, որ ինքն էլ անհարմար վիճակում չհայտնվի։

Նինա Մարգարյանի ֆԲ էջից