Ռուսաստանում 4 ամսական տղային, որին դանակով վնասել էր մայրը, կուղարկեն Մոսկվա՝ տեսողությունը վերականգնելու նպատակով

Ռուսաստանի Դաշնության կազմում ընդգրկված Խակասիայի ինքնավար մարզում ապրող 4 ամսական տղային, որի աչքերը հանել էր սեփական մայրը, կուղարկեն Մոսկվա, որտեղ լավագույն բժիշկները կփորձեն փրկել մեկ աչքի տեսողությունը։

Ինչպես հաղորդում է ren.tv-ն, երեխայի մյուս աչքն ամբողջովին վնասվել է և այլևս չի տեսնի։ Դաժան պատմության մասին տեղեկություն էր տարածվել հոկտեմբերի 25-ին, երբ 36-ամյա կինը, որը 4 երեխայի մայր է, ամուսնուն կասկածել է դավաճանության մեջ, որից հետո հարևանների խոսքով՝ խենթացել է։

«Կինը պատահաբար իմացել է, որ ամուսինը դավաճանում է իրեն։ Նրա վրա մռայլություն է իջել։ Երբ տղամարդը վերադարձել է տուն, ամեն ինչ արդեն տեղի էր ունեցել։ Կինը դանակով հարված էր հասցրել երեխայի աչքին»,- ասել է աղբյուրը։

Նշվում է, որ կինը գիտակից է եղել, երբ նրան ձերբակալել են։ Հայրը տուժած երեխայի հետ հիվանդանոց է գնացել, իսկ մյուս երեխաներին հարազատներն են տարել։ Փոքրիկ տղայի կյանքին այժմ վտանգ չի սպառնում։