Իսրայելցի քաղաքական գործիչները Երուսաղեմին կոչ են անում ճանաչել Հայոց ցեղասպանությունը

Միանգամից երկու իսրայելցի քաղաքական գործիչներ Երուսաղեմին կոչ են արել ճանաչել Հայոց ցեղասպանությունը՝ հետեւելով ԱՄՆ Ներկայացուցիչների պալատի օրինակին, հաղորդում է The Times of Israel-ը:

«Կախոլ լավան» դաշինքի ղեկավարներից մեկի՝ Յայիր Լապիդի խոսքով՝ Հայոց ցեղասպանության ճանաչման մասին ԱՄՆ Ներկայացուցիչների պալատում տեղի ունեցած քվեարկությունը պատմական ճշմարտության համար ձայն էր: «Դա պատմական ճշմարտության եւ արդարության համար ձայն էր: Չի կարելի թույլ տալ, որպեսզի Թուրքիան վախեցնի աշխարհին եւ հերքի ցեղասպանությունը: Ես կշարունակեմ պայքարել Իսրայելի կողմից Հայոց ցեղասպանության ճանաչման համար»,- գրել է նա Twitter-ում:

Աղբյուրի հաղորդմամբ՝ Լապիդը տարեսկզբին Հայոց ցեղասպանության ճանաչման մասին Քնեսեթում ներկայացված օրինագծի հեղինակներից էր: Ապրիլին նա Twitter-ում գրել էր, որ ժամանակն է պաշտոնապես ճանաչել Հայոց ցեղասպանությունը: Քնեսեթի պատգամավոր Գիդեոն Սաարը եւս կոչ է արել ճանաչել Հայոց ցեղասպանությունը: «Ես ողջունում եմ ԱՄՆ Ներկայացուցիչների պալատի սկզբունքային եւ բարոյական դիրքորոշումը՝ 100 տարի առաջ հայերի սպանությունը ցեղասպանություն ճանաչելով: Իսրայելը եւս պետք է հստակ հայտարարի այդ սարսափելի վայրագության ճանաչման մասին»,- գրել է նա Twitter-ում:

Նշենք, որ Հայոց ցեղասպանության ճանաչման հարցն ամեն տարի բարձրացվում է Քնեսեթում, որպես կանոն, օրենսդրական տեսքով, այլ ոչ թե քննարկումների կոչով: Հարցն ամեն տարի 1989-ից հանվել է օրակարգից: Այդ տարի Քնեսեթի պատգամավոր Յայիր Ցաբանն առաջին անգամ խոսել է ցեղասպանության մասին: Ըստ աղբյուրի՝ Իսրայելը հրաժարվում է կոտորածը պաշտոնապես ցեղասպանություն ճանաչել՝ աշխարհաքաղաքական եւ ռազմավարական նկատառումներից ելնելով, եւ, առաջին հերթին, Թուրքիայի հետ հարաբերությունների պատճառով: Հունիսի վերջին Քնեսեթում ծրագրված քվեարկությունը չեղարկվեց պետական աջակցության բացակայության պատճառով: