Իտալացի պատգամավորը Եվրախորհրդարանում ելույթի ժամանակ գետնին է նետել թուրքական կոնֆետներով տուփը (տեսանյութ)

Իտալացի պատգամավոր Անջելո Չիոկան Եվրախորհրդարանի արտահերթ նիստում ունեցած ելույթի ժամանակ դատապարտել է Թուրքիայի ռազմական գործողությունը Սիրիայում: Այս մասին տեղեկացնում է En Son Haber լրատվականը:

Պատգամավորն իր ելույթի ժամանակ, ի պատասխան Սիրիայի հյուսիսում Թուրքիայի ռազմական գործողությունների, գետնին է նետել թուրք պատգամավորների նվիրած թուրքական շոկոլադի տուփը, որի վրա Թուրքիայի դրոշն է պատկերված եղել, և կոչ է արել իր գործընկերներին նույն կերպ վարվել:

«Ես ասում եմ ո՛չ այսպիսի Թուրքիային»,- նշել է Չիոկան:

Նա հավելել է, որ թուրքական բանակը կրակ է բացել քաղաքացիական բնակչության վրա, և ինքը «մարդասպաններին և ահաբեկիչներին աջակցողներից» նվերներ չի ընդունում:

Հիշեցնենք, որ հոկտեմբերի 22-ին Սոչիում Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի հանդիպման արդյունքում կնքվել է հուշագիր, որի 5-րդ կետում նշվում է, որ սկսած հոկտեմբերի 23-ի ժամը 12:00-ից թուրք-սիրիական սահմանի սիրիական կողմում, որը դուրս է Թուրքիայի «Խաղաղության ակունք» գործողության շրջանից, կմտնեն ՌԴ ռազմական ոստիկանության և Սիրիայի սահմանապահ ջոկատները: Նրանք կնպաստեն քրդական խմբավորումների դուրսբերմանը թուրք-սիրիական սահմանից 30 կմ հեռավորության վրա, որը պետք է ավարտվի հոկտեմբերի 23-ի ժամը 12:00-ից սկսած 150 ժամվա ընթացքում: