Մեքսիկայի նախագահը դրական է վերաբերվել նարկոբարոն Էլ Չապոյի որդուն ազատ արձակելու որոշմանը

Մեքսիկայի նախագահ Անդրես Մանուել Լոպես Օբրադորը դրական է վերաբերվել նարկոբարոն Հոաքին Գուզմանի (Էլ Չապո) որդու՝ Օվիդիո Գուզման Լոպեսին ձերբակալությունից անմիջապես հետո ազատ արձակելու որոշմանը, հաղորդում է BBC-ը:

Նախագահի խոսքով՝ ձերբակալությունը չեղարկելու մասին որոշումը բազմաթիվ կյանքեր է փրկել:

«Այդ որոշումն ընդունած պաշտոնական անձինք ճիշտ քայլ են կատարել»,-մամուլի ասուլիսի ժամանակ հայտարարել է Մեքսիկայի նախագահը:

Ըստ վերջին տվյալների՝ մեքսիկական Կուլյականում ուժային կառույցների եւ Գուզման Լոպեսի մարդկանց միջեւ հրաձգության հետեւանքով զոհվել է առնվազն 8 մարդ, եւ վիրավորվել է ավելի քան 20 մարդ: Բացի այդ, այրվել են մոտակայքում կայանված ավտոմեքենաները:

Օվիդիո Գուզման Լոպեսը Էլ Չապոյի որդիներից մեկն է, որոնք ղեկավարում են հոր «Սինալոա» նարկոկարտելը:

Կարտելը համարվում է ԱՄՆ-ում թմրանյութերի ամենախոշոր մատակարարը:

Ինքը՝ Հոաքին Գուզմանը, գտնվում է Միացյալ Նահանգների բանտում:

Հիշեցնենք, որ Օբրադորի նախընտրական խոստումներից մեկը երկիրը նարկոբիզնեսից ազատելն էր: