Վերականգնել ավիահաղորդակցությունը, քանի դեռ Վրաստանը հանդիպական քայլեր չի կատարել, սխալ է. Վոլոդին

Վերականգնել Ռուսաստանի եւ Վրաստանի միջեւ ավիահաղորդակցությունը, քանի դեռ Վրաստանի իշխանությունները հանդիպական քայլեր չեն կատարել, սխալ է: Այս մասին հայտարարել է ՌԴ Պետդումայի խոսնակ Վյաչեսլավ Վոլոդինը, հաղորդում է ՌԻԱ Նովոստին:

«Իհարկե, ճիշտ կլիներ, որ Վրաստանի նախագահը հնարավորինս արագ ներողություն խնդրեր: Ուժեղ մարդը միշտ այդպես է վարվում, եթե նա սխալ է գործել կամ ինչ-որ չմտածված քայլ է արել: Եվ եթե նման արարք են թույլ տալիս պետությունների ղեկավարները, ապա ի՞նչ հարաբերությունների մասին է խոսքը… Դեռեւս միակ որոշումն ավիահաղորդակցության արգելքն է: Սակայն մենք կարծում ենք, որ քանի դեռ մեր երկրին ընդառաջ քայլեր չեն կատարվել, ավիահաղորդակցությունը վերականգնելու մասին խոսելը սխալ է»,- ասել է նա:

Ռուս-վրացական հարաբերությունները սրվել են Թբիլիսի ռուս պատգամավորների այցից հետո: Թբիլիսիում հունիսին բողոքի ակցիաներ են բռնկվել: Այդ ֆոնին ՌԴ նախագահը երկու երկրների միջեւ ավիահաղորդակցության դադարեցման մասին հրամանագիր է ստորագրել: ՌԴ տրանսպորտի նախարարության հաղորդմամբ՝ քննարկվում է թռիչքների դադարեցման պատճառով ավիափոխադրողներին փոխհատուցում տրամադրելու հարցը: Սեպտեմբերի սկզբին հաղորդվել է, որ տրանսպորտի նախարարությունը համապատասխան առաջարկ չի ներկայացրել կառավարությանը: