Իրանը պատրաստ է բանակցել ԱՄՆ-ի հետ «5+1» ձևաչափի շրջանակներում՝ պատժամիջոցների չեղարկման պայմանով. Ռոհանի

Թեհրանը պատրաստ է ԱՄՆ-ի հետ բանակցությունների «5+1» ձևաչափի շրջանակներում, սակայն նախևառաջ պետք է չեղարկվեն պատժամիջոցները և ապահովվեն իրանցի ժողովրդի շահերը: РИА Новости-ի փոխանցմամբ՝ այս մասին հայտարարել է Իրանի նախագահ Հասան Ռոհանին:

«Ես անմիջականորեն հայտնել եմ եվրոպացի առաջնորդներին, որ հենց վստահ լինեմ, որ Իրանի շահերն ապահովված կլինեն և Իրանի ժողովուրդն ազատված կլինի ճնշումներից, հենց հասկանամ, որ հանդիպումը կապահովվի Իրանի շահերը, պատրաստ եմ ինձ զոհաբերել հանուն իրանցի ժողովրդի»,- ասել է Ռոհանին մամլո ասուլիսի ժամանակ:

Պատասխանելով հարցին, թե արդյո՞ք Թեհրանը բանակցություններ կվարի ԱՄՆ-ի այլ նախագահի հետ Դոնալդ Թրամփի իմպիչմենթի դեպքում, Ռոհանին նշել է, որ կարևորը պատժամիջոցների չեղարկումն է:

ՄԱԿ-ի Գլխավոր ասամբլեայի շրջանակներում ևս Թեհրանը հայտարարել էր, որ չի վախենում բանակցություններից և ձգտում է խաղաղության Մերձավոր Արևելքում: Ռոհանիի խոսքով՝ Իրանը պատրաստ էր բանակցել Նյու Յորքում «5+1» ձևաչափով՝ երկրների նախագահների մակարդակով, որը նախատեսում է նաև ԱՄՆ-ի մասնակցությունը: