Տասնյակ զոհեր՝ թուրքական բանակի գործողության հետևանքով

Սիրիայի հյուսիսում թուրքական բանակի գործողությունների երրորդ օրը հաղորդվում է, որ թուրքական զորամիավորումները վերահսկողության տակ են վերցրել սահմանամերձ սիրիական 7 գյուղեր: Տասնյակ հազարավոր մարդիկ փախչում են մարտական գործողությունների շրջաններից:

Զոհերի մասին տարբեր տեղեկություններ են հաղորդվում: Ըստ Բրիտանիայում գործող «Մարդու իրավունքների սիրիական դիտարան» կազմակերպության՝ քրդամետ ուժերից 29 զինյալ է զոհվել և 10 քաղաքացիական անձ: 17 զոհ է տվել թուրքամետ «Սիրիայի ազգային բանակը»: Թուրքիան հայտնել է իր բանակի մեկ զինվորի զոհվելու և երեքի վիրավորվելու մասին:

Զոհեր կան նաև Թուրքիայի տարածքում: Սիրիական կողմից կատարված ռմբակոծության հետևանքով սահմանամերձ թուրքական քաղաքում առնվազն 5 մարդ է զոհվել, այդ թվում՝ մեկ երեխա: Այդ մասին հայտնել են թուրք պաշտոնյաները: