Թրամփը Ռիկ Փերիին մեղադրում է Ուկրաինայի նախագահի հետ «տխրահռչակ» հեռախոսազանգի մեջ

Նախագահ Դոնալդ Թրամփը հանրապետականներին հայտնել է, որ ինքը չի ցանկացել զանգահարել Ուկրաինայի նախագահ Վլադիմիր Զելենսկուն, և որ նա դա արել է միայն էներգետիկայի նախարար Ռիկ Փերիի պնդմամբ, հաղորդում է Axios-ը՝ իրազեկ աղբյուրներին հղումով:

Թեև Թրամփը հանրապետականներին հայտնել է, որ հուլիսի 25-ին իր և Զելենսկու միջև կայացած հեռախոսազանգը «կատարյալ» էր, սակայն խոստովանել է, որ իրականում մտադրություն չի ունեցել զանգահարել Ուկրաինայի նախագահին:

«Քչերը գիտեն այս մասին, բայց ես նույնիսկ չէի ցանկանում զանգահարել: Ես զանգահարեցի միայն այն պատճառով, որ Ռիկը խնդրեց ինձ... հեղուկացված գազի հետ կապված»,- աղբյուրի հաղորդմամբ՝ ասել է Թրամփը:

Axios-ի մյուս աղբյուրը նշում է, որ Թրամփը զգուշացրել է, որ «առաջիկա մի քանի օրերին ավելի շատ ճշմարտություններ ջրի երես դուրս կգան»:

Աղբյուրի հաղորդմամբ՝ այս խոսակցությունները կայացել են Փերիի՝ նոյեմբերի վերջին հրաժարական տալու վերաբերյալ լուրերի ֆոնին:

Հիշեցնենք, որ ավելի վաղ ԱՄՆ-ում խոշոր սկանդալ էր բորբոքվել Ուկրաինայի նախագահ Վլադիմիր Զելենսկու հետ Թրամփի հուլիսյան հեռախոսազրույցի շուրջ, որն առիթ էր դարձել ԱՄՆ առաջնորդի նկատմամբ պաշտոնանկության գործընթաց սկսելու համար: Ինչպես պնդում են ԱՄՆ-ի նախագահի քաղաքական ընդդիմախոսները, Թրամփը զանգի ժամանակ փորձել է Զելենսկիին համոզել Ուկրաինայում Ջոզեֆ Բայդեն Հանթերի որդու գործունեության հետաքննություն սկսել՝ Կիևին ֆինանսական և ռազմական օգնություն ցուցաբերելու դիմաց: