Իրաքում 5-օրյա հակակառավարական ցույցերի հետևանքով զոհերի թիվը մոտեցել է 100-ի

Իրաքում շարունակվող հակակառավարական ցույցերի ժամանակ զոհվածների թիվը հասել է մոտ 100-ի: BBC News-ի փոխանցմամբ՝ այս տվյալները հաղորդել է երկրի խորհրդարանի մարդու իրավունքների հարցով հանձնաժողովը:

Շաբաթ արդեն հինգերորդ օրն է, ինչ չեն դադարում բողոքի ցույցերն ու բախումները Բաղդադում: Հաղորդվում է, որ անվտանգության ուժերը կրկին մարտական փամփուշտներ են կիրառել:

Ցուցարարները նշում են, որ իրենք պայքարում են գործազրկության, անբարեխիղճ հանրային ծառայությունների և կոռուպցիայի դեմ:

Բողոքի ցույցերն ընկալվում են որպես առաջին մարտահրավեր, որին բախվել է վարչապետ Ադել Աբդել Մահդիի թույլ կառավարությունն իշխանության գալուց մեկ տարի անց:

Իշխանությունները փորձում էին ցույցերը վերահսկել պարետային ժամ սահմանելով կամ համացանցի ամբողջական արգելափակմամբ: Այսօր առավոտյան նախատեսված խորհրդարանական արտահերթ նիստը չկայացավ: Ցերեկային պարետային ժամը Բաղդադում չեղարկվել է, որից հետո ցուցարարների փոքր խմբեր են հայտնվել փողոցներում՝ վերսկսելով բողոքի ակցիաները: