Իրանում «ԿՀՎ-ի լրտեսին» մահապատժի են դատապարտել

Իրանում դատարանը լրտեսության համար մեղադրվող անձի առնչությամբ մահվան դատավճիռ է կայացրել: Վերջինս մեղադրվում է ԱՄՆ-ի Կենտրոնական հետախուզական վարչության հետ համագործակցության համար, գրում է Ամերիկայի ձայն-ի ռուսական ծառայությունը:

Երեքշաբթի նույն մեղադրանքով ևս երկու անձ 10 տարվա ազատազրկման է դատապարտվել: Միևնույն պատժաչափը սահմանվել է ևս մեկ անձի առնչությամբ` այս անգամ` հօգուտ Մեծ Բրիտանիայի լրտեսության համար:

Վճիռը կայացրած դատարանի ներկայացուցիչ Գոլամհոսեյն Էսմայիլիի խոսքով` մահվան դատապարտված անձը դատավճռի վերանայման հայցով միջնորդություն է ներկայացրել: Գործի առնչությամբ վերջնական որոշումը կկայացնի Իրանի վերաքննիչ դատարանը:

Թեհրանը, սակայն, հրաժարվել է հրապարակել մահվան դատավճիռ ստացած ենթադրյալ լրտեսի անունը:

Էսմայիլին, այնուամենայնիվ, բացահայտել է ամերիկյան հետախուզական ծառայության հետ համագործակցության համար մեղադրվող 2 անձանց անունները. 10 տարվա ազատազրկման դատապարտված անձինք Իրանի քաղաքացիներ Ալի Նաֆրիհը և Մուհամեդ Ալի Բաբապուրն են, որոնք դատարանի որոշմամբ պետք է 55 հազար ԱՄՆ դոլար վճարեն. սա այն գումարն է, որը դատարանի եզրակացությամբ «լրտեսները» ստացել են ԿՀՎ-ի կողմից` իրենց կողմից մատուցված «ծառայությունների» համար:

Ավելի վաղ հայտնի էր դարձել, որ Իրանի նախագահի եղբայրը կոռուպցիայի մեղադրանքով 5 տարվա ազատազրկման է դատապարտվել: Նախագահի եղբայրը ձերբակալվել է 2017 թվականին, սակայն դատարանը մեղադրական վճիռը կայացրել է միայն 2019 թվականի մայիսին: Պատժաչափի վերաբերյալ տեղեկատվությունը հայնտի է դարձել միայն հոկտեմբերի մեկին: