Իրանը այլեւս չպետք է վստահի եվրոպացիներին. Խամենեի

Իրանը այլեւս չպետք է վստահի եվրոպացիներին, քանի որ նրանք 2015 թվականի միջուկային գործարքով իրենց 11 պարտավորությունները չեն կատարել ԱՄՆ-ի դուրս գալուց հետո: Այս մասին հայտարարել է Իրանի գերագույն առաջնորդ, այթոլլահ Ալի Սայեդ Խամենեին, փոխանցում է Press TV-ն:

Նրա խոսքով՝ բանակցություններին մասնակցած իրանցի պաշտոնատար անձինք ասում են, որ եվրոպացիները չեն կատարել իրենց պարտավորություններից ոչ մեկը: «Սա ամենածանրակշիռ պատճառն է, թե ինչու մենք չպետք է նրանց վստահենք ոչ մի ոլորտում»,- ասել է նա

«Չնայած իրենց խոստումներին, եվրոպացիները գործնականում հավատարիմ են մնացել Իրանի դեմ ամերիկյան պատժամիջոցներին եւ ոչ մի գործողություն չեն ձեռնարկել»,- ասել է Իրանի հոգեւոր առաջնորդը:

Նրա խոսքով՝ քիչ հավանական է, որ նրանք ապագայում Իսլամական Հանրապետության համար ինչ-որ բան կանեն, եւ հենց այս պատճառով Իրանը չպետք է հույս դնի եվրոպացիների վրա: