ԱՄՆ-ը հոկտեմբերին Լիտվայում 500 զինծառայող կտեղակայի

Վեցամսյա փոխատեղման ծրագրի շրջանակներում ԱՄՆ-ը հոկտեմբերին Լիտվայում 500 զինծառայող կտեղակայի, հայտնում է «Ամերիկայի ձայն»-ը։

Այս տարածաշրջանում ամերիկյան ռազմական ներկայությունը, որը ՆԱՏՕ-ի երկրների կողմից անցկացվող զսպման ընդհանուր քաղաքականության մի մասն է, հավանաբար, կհանգստացնի դաշնակիցներին Բալթիկայում այն առումով, որ ԱՄՆ նախագահ Դոնալդ Թրամփը հավատարիմ է մնում Արեւելյան Եվրոպայի երկրների աջակցման գաղափարին՝ չնայած Պենտագոնը վերջերս կրճատել է իր եվրոպական պաշտպանական նախագծերի ֆինանսավորումը։

«Մեսիջն այն է, որ ԱՄՆ ուժերը կարող են գալ ցանկացած ժամանակ ցանկացած վայր, որտեղ նրանք անհրաժեշտ են, եւ այն քանակով, որքան անհրաժեշտ է»,- Reuters-ին տված հարցազրույցում ասել է Լիտվայի պաշտպանության նախարար Ռայմոնդաս Կարոբլիսը։

Ամերիկյան նոր սեղմ զորամիավորումը ներառում է 30 «Աբրամս» տանկ, որն, ըստ նախարարի, ավելի շատ է, քան անցյալ տեղակայման ժամանակ։ Զորամիավորման կազմում կա նաեւ 25 հետեւակային «Բրեդլի» մարտական մեքենա եւ 70 այլ տրանսպորտային միջոց։

Ամերիկյան զորքերը Լիտվայից կհեռանան 2020թ․ գարնանը կայանալիք զորավարժություններից հետո։

Այս ամիս Պենտագոնը հրապարակել է Եվրոպայում իր ռազմական նախագծերի ցանկը։ Դրանք այլեւս Զսպման եվրոպական նախաձեռնության (EDI) շրջանակներում ամերիկյան կողմից չեն ֆինանսավորվի։ Կրճատումների այդ ծրագրի արժեքը կազմում է 700 միլիոն դոլար։